İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 403 Hüküm no: 390 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazer v. Melkon’un, Sarraf İstefan ve Sarraf Mikail aleyhine açtığı davada iddiasını ispat edemediğinden muarazadan men edildiği Mu‘ârazadan men‘ i‘lâmı Ma‘rûz[-ı dâ‘î-i devlet-i aliyyeleridir ki] Sâhib-i arzuhâl Kazer v. Melkon nâm zimmî Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde ismi mastûr Sarraf İstefan v. Dimitri v. Adem tarafından husûs-ı âtîde vekâlet-i âmme ile vekîl olduğu Nikola v. İstemat ve İstavri v. Panayot nâm zimmîler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Sarraf Mikail v. Yanaki nâm zimmî muvâcehesinde bin iki yüz otuz dört senesi Zilka‘deti’ş-şerîfesinin on dördüncü günü mâlımdan mudârebe tarîkiyle i‘mâl ve hâsıla olan fâideyi münâsafaten beynimizde iktisâm etmek üzere müvekkil-i mesfûr Sarraf İstefan zimmîye def‘ ve teslîm edüp ol dahi yedimden ahz ü kabz eylediği bâ-defter-i müfredât ma‘lûmü’l-kıyem eşyâ-i ma‘lûme ve nakden cem‘an yetmiş beş bin üç yüz doksan altı guruş on paradan eşyâ-i mezkûreyi semen-i makbûza âhara bey‘ ve asl-ı mâl-ı merkūm ile hâsıla olan fâideyi kendi umûruna sarfla istihlâk edüp zimmetine ta‘alluk ettikden sonra müvekkil-i mesfûr Sarraf İstefan zimmî asl-ı mâl-ı mezbûr yetmiş beş bin üç yüz doksan altı guruş on paradan elli sekiz bin yüz yetmiş iki guruşu ceste ceste bana def‘ ve teslîm ben dahi yedinden ahz ü kabz etmemle asl-ı mâldan bâkī zimmetinde olan on yedi bin iki yüz yirmi dört guruş on para ile müddet-i ma‘lûmede fâide-i hâsıladan dahi ba‘de’l-muhâsebe nısf hissemi mesfûra izâfetle vekîl-i mersûm Sarraf Mikail zimmîden taleb ederim deyü ba‘de’d-da‘vâ ve’l-istintak vekîl-i mersûm Sarraf Mikail zimmî cevâbında müvekkil-i mersûm Sarraf İstefan zimmînin meblağ-ı merkūmdan gerek nakid ve gerek eşyâ kıymetinden müdde‘î-i mesfûr yedinden kabz ve istihlâk ile zimmetinde ta‘alluk eden ancak yirmi bir bin yüz on guruşa bâliğ oldukdan sonra müvekkilim mesfûr Sivas kazâsına gidip ikāmet ettikte müdde‘î-i mersûm Kazer zimmî meblağ-ı mezbûru taleb ve da‘vâ ve ahz ü kabza ve ibrâya tarafından gāib ani’l-meclis Boduroğlu İstavri nâm zimmîyi tevkîl ve irsâl ol dahi kazâ-i merkūmda ber-nehc-i şer‘î ba‘de isbâti’l-vekâle müvekkilim mesfûr bi’l-vekâle kabzını mu‘terif olduğum meblağ-ı merkūm yirmi bir bin yüz on guruşun iki bin yedi yüz yirmi yedi guruşunu nakden vekîl-i mersûma edâ ve mâ‘adâ on sekiz bin üç yüz seksen üç guruşuna ma‘lûmü’l-esâmî kimesnelerden havâle vermekle vekîl-i mesfûr dahi bi’l-vekâle ba‘de’l-kabz ve’l-kabûl husûs-ı mezkûra müte‘allika âmme-i da‘vâdan müvekkilim mesfûrun zimmetini kabûlü hâvî bi’l-vekâle ibrâ ve iskāt ettikden sonra müdde‘î-i mesfûr Kazer zimmî bi-nefsihî Sivas kazâsına gidip müvekkilim mesfûrun vekîl-i mersûma verdikleri havâlât kabûl olunmadığı beyân ve verdiği havâle kâğıdlarını kendüye edâ ve teslîm ettikden sonra müvekkilim mesfûr Sarraf İstefan zimmî dahi meblağ-ı merkūm on sekiz bin üç yüz seksen üç guruşu işbu yedimde olan bin iki yüz otuz beş senesi Zilhicceti’ş-şerîfesi gurresi târihiyle muvarraha ve ol târihde kazâ-i mezbûrda nâibü’ş-şer‘i’ş-şerîf olan Ali Efendi’nin imzâ ve hatmini hâviye bir kıt‘a hüccet-i şer‘iyye nâtıka olduğu üzere müdde‘î-i mesfûr Kazer zimmîye bi’l-asâle nakden ve tamamen edâ ve teslîm ol dahi yedinden ahz ü kabz edüp husûs-ı şirketden bir nesne kalmadı deyü ikrâr ve ibrâ-i âm ile müvekkilim mesfûrun zimmetini kabûlü hâvî asâleten ibrâ ve iskāt dahi edüp ba‘dehû müdde‘î-i mesfûr Kazer zimmî târih-i i‘lâm senesi Cemâziyelâhiresinin yirmi birinci günü ile müverrah ve sâbıkā Rumeli Kazaskeri Semâhatlü fazîletlü Sıdkızâde Ahmed Reşid Efendi hazretlerinin hatimlerini hâvî işbu yedimde olan bir kıt‘a i‘lâm-ı şer‘î mantûkunca dahi Cuma günü arz odasında huzûr-ı hazret-i âsafîde husûs-ı mezkûru yine bi-aynihî bâlâda tahrîr olunduğu üzere asâleten müvekkilim mesfûr muvâcehesinde da‘vâ ol dahi cevâbında ber-vech-i meşrûh hüccet-i mezkûreyi ibrâz ile ber-nehc-i şer‘î eylediği defini ve mazmûn-ı hüccet-i merkūmeyi tâyi‘an ikrâr u i‘tirâf edüp lâkin mesfûr İstefan zimmî târih-i hüccet-i merkūmda Sivas Vâlisi sarrafı olmağla ibrâ etmediğim sûretde benden şikâyet eder mülâhazama binâen ibrâ etmişdim öyle olucak mükrehen ibrâ etmiş olurum deyü sûret-i def‘de îrâd eylediği kelâm-ı kerh mu‘teber olmayup a‘zâr-ı vâhiyeden olmağla iltifâta şâyân olmayup mûcebiyle müdde‘î-i mesfûr Kazer zimmî da‘vâ-yı mezkûresiyle müvekkilim mersûme bî-vech-i şer‘î mu‘ârazadan men‘ olunmağla ol vechile hâlâ da‘vâ-yı mezkûresinden müvekkilim mesfûrun külliyen zimmeti berîe olmuşdur deyü bir kıt‘a hüccet-i şer‘iyye ve bir kıt‘a i‘lâm-ı şer‘î ibrâzıyla bi’l-vekâle eylediği def‘ini ve zikr olunan hüccet-i şer‘iyye ve i‘lâm-ı şer‘î mazmûnlarını müdde‘î-i mesfûr Kazer zimmî hâlâ tamamen ikrâr u i‘tirâf etmeğin alâ-mûcebi ikrârihi müdde‘î-i mesfûr Kazer zimmî da‘vâ-yı mezkûresiyle mevekkil-i mersûm Sarraf İstefan ve vekîl-i mesfûr Sarraf Mikail zimmîlere bî-vech-i şer‘î mu‘ârazadan men‘ olunduğu İstanbul Mahkemesi’nden huzûr [-ı âlîlerine i‘lâm olundu.] Fî 5 Za sene [1]237