İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 409 Hüküm no: 393 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Hasan’ın, Sarraf Topal Agob v. Begos aleyhine açtığı alacak davasında iddiasını ispat edemediğinden muarazadan men edildiği Mu‘ârazadan men‘ Ma‘rûz[-ı dâ‘î-i devlet-i aliyyeleridir ki] Dergâh-ı âlî -dâme mahfûfen bi’l-me‘âli- gediklülerinden sâhib-i arzuhâl Za‘îm el-Hâc İbrahim Ağa b. Hasan Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde derûn-ı arzuhâlde mastûrü’l-ism Sarraf Topal Agob v. Begos nâm zimmî muvâcehesinde Yenişehri sancağında Ararim nâhiyesinde vâki‘ traşçı ve serkiz sarayı nâm bâ-berât-ı âlîşân mutasarrıf olduğum ze‘âmetimin bin iki yüz otuz altı senesi Martı ibtidâsından Şubatı gāyetine değin bir sene zabt ve ta‘aşşürünü hâvî kendi hatmiyle mahtûm iltizâm temessükünü bundan akdem katîlen hâlik olan Sarraf Acı Vasil zimmîye teslîm edüp bedel-i iltizâmı olan iki bin beş yüz guruşu bana vermeden katîlen hâlik oldukdan sonra temessük-ı merkūmu mesfûr Agob zimmînin yedinde bulduğumda bedel-i iltizâm-ı mezkûr iki bin beş yüz guruşun yüz guruşunu mesfûr Agob zimmî bana def‘ ve teslîm ben dahi yedinden kabz etmemle bedel-i iltizâm-ı mezkûrun mâ‘adâsı olan iki bin dört yüz guruşunu dahi mücerred temessük-ı merkūmu yedinde bulduğuma binâen mesfûr Agob zimmîden taleb ederim deyü takrîr-i meşrûhu üzere eylediği bedel-i iltizâm da‘vâsı meşrû‘a olmayup bu mertebe ile mesfûr Agob zimmîye şer‘an suâl dahi teveccüh etmediği müdde‘î-i merkūma tefhîm ve da‘vâ-yı mezkûresiyle bî-vech-i şer‘î mu‘ârazadan men‘ olunduğu İstanbul Mahkemesi’nden [huzûr-ı âlîlerine i‘lâm olundu.] Fî 12 Za sene [1]237