İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 409 Hüküm no: 394 Orijinal metin no: [82a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Hüseyin ile Ömer Ağa b. Ali’nin birbirlerinin zimmetlerini ibrâ ettikleri İbrâ ve ittifâk Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da Lanka Yenikapısı hâricinde kâin sermâyeci manav ustalarından sâhib-i arzuhâl es-Seyyid Mustafa Ağa b. es-Seyyid Hüseyin nâm kimesne meclis-i şer‘-i münîrde başyemiş pazarbaşısı İbrahim Sârım Bey ve manav ustalarından mazbûtü’l-esâmî Müslimîn hâzır oldukları hâlde derûn-ı arzuhâlde mezkûrü’l-ism es-Seyyid Ömer Ağa b. el-Hâc Ali nâm kimesne muvâcehesinde zikr olunan Lanka Yenikapısı hâricinde basmacılar cânibinde vâki‘ iki tarafdan kahve dükkânı ve Hacı Hüseyin mağazası ve bir tarafdan cidâr-ı hısn ve bir tarafı tarîk-i âm ile mahdûd bir bâb sermâyeci manav mağazası ve mülhakātı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme mukaddemâ yedimde mâlım ve mülküm iken nısf-ı şâyi‘ini bin iki yüz otuz bir senesi hılâlinde bin altı yüz guruş semen-i makbûza mezbûr es-Seyyid Ömer Ağa’ya tarafeynden bi’l-îcâb ve’l-kabûl bâtten ve sahîhan bey‘ ve temlîk ve vech-i lâyıkı üzere teslîm eylediğimden sonra mezbûr es-Seyyid Ömer Ağa nısf-ı âlât-ı mezkûreyi işbu târihden iki sene mukaddem bin dokuz yüz guruş semen tesmiyesiyle yine bana bey‘ ve semen-i merkūmdan yüz elli guruşunu yedimden ahz edüp nısf-ı âlât-ı mezkûreyi hâlâ bana teslîm etmemekle semen-i merkūmdan bâkī bin yedi yüz elli guruşu yedimden ahz ile nısf-ı âlât-ı mezkûreyi bana teslîme mezbûr es-Seyyid Ömer Ağa’ya tenbîh olunmak matlûbumdur deyü da‘vâ eylediğimde ol dahi cevâbında nısf-ı âlât-ı mezkûreyi evvelâ şirâsını ikrâr lâkin sâniyen benim ber-vech-i muharrer kendiden şirâ müdde‘âmı inkâr edüp ol vechile beynimizde ba‘de vukū‘ı’l-münâza‘a muslihûn tavassutuyla ben da‘vâ-yı mezkûremden meccânen fâriğ olmamla zikr olunan mağaza ve mülhakātı âlât-ı lâzıme-i merkūmesinin nısf-ı şâyi‘i hâlâ mezbûr es-Seyyid Ömer Ağa’nın mâl-ı müşterâsı ve nısf-ı âharı kemâ-kân benim mâlım olup tarafeynden her birimiz âharın nısf hissesinde kat‘an alâka ve medhalimiz olmamağla husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî meccânen ibrâ ve iskāt ol vechile külliyen kat‘-ı nizâ‘ edüp fîmâ ba‘d ber-vech-i muharrer nısfiyet üzere gediğine mâlikler olduğumuz mağaza-i mezkûre ve mülhakātında mezbûr es-Seyyid Ömer Ağa ile bi’l-ma‘iyye iskân edüp ahz u i‘tâ etmek üzere ittifâk ve ittihâd eyledik deyü ikrâr ve tasdîkleri tescîl ve İstanbul Mahkemesi’nden [huzûr-ı âlîlerine i‘lâm olundu.] Fî 25 Za sene [1]237