Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 314 Hüküm no: 339 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mehmed’in mirası hususunda vârislerinin sulh olması Mahrûse-i Üsküdar’da kassâm odalarında sâkine iken bundan akdem vefât eden Ayşe bt. Mehmed nâm hâtunun verâseti zevci Mehmed b. Seydî Cafer ile li ebeveyn er karındaşı kızı Fâtıma bt. Mehmed nâm hâtuna münhasıra olduğu şer‘an mütehakkik oldukdan sonra mezbûr Fâtıma Hâtun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Halil Çelebi b. Süleyman ve Musa b. Mustafa nâm kimesneler şehâdetleriyle şer‘an sâbit olan el-Hâc Süleyman b. Abdullah meclis-i şer‘-i şerîf-i enverde müteveffât-ı mezbûrenin terekesine vâzı‘ü’l-yed olan işbu bâ‘isü’l-kitâb zevci mezbûr Mehmed mahzarında bi’l-vekâle ikrâr ve takrîr-i kelâm edip müvekkilem mezbûre Fâtıma Hâtun mûrisesi müteveffât-ı mezbûre Ayşe’nin terekesinden nısf hissesi mukābelesinde mezbûr Mehmed ile şerâit-i sıhhat-i sulhü hâvî menâfi‘i müfsideden ârî bi tarîki’t-tehârüci’ş-şer‘î nukūd-ı terekeden hissesinden ezyed beş yüz akçe üzerine sulh olup ve bedel-i sulh olan meblağ-ı mezbûr beş yüz akçeyi mezbûr Mehmed müvekkile-i mezbûreye def‘ ve teslîm ol dahi yedinden tamâmen ahz u kabz edip tereke-i müteveffât-ı mezbûre müte‘allik âmme-i da‘vâdan her biri âharın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Attâr Ahmed b. Siyavuş, berber Halil b. ( ), Murtaza b. Abd[ullah], berber Hasan b. Abdullah.