İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 410 Hüküm no: 395 Orijinal metin no: [82a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Hüseyin’in ayakkabıcı esnaflığından çıkarıldığı Haffâflıktan ihrâc Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da Çarşı-yı Kebîr’de vâki‘ büyük arasta haffâfları kethüdâsı Hasan Ağa ve Yiğitbaşı Sadi ile esnâfından el-Hâc Halil Efendi ve Ahmed Ağa ve el-Hâc Mehmed Ağa ve İsmail Ağa ve el-Hâc Hasan Ağa ve el-Hâc Osman Ağa ve Esad Efendi ve Hüseyin Efendi ve Ebûbekir Ağa ve Mehmed Ağa ve Ahmed Efendi ve diğer Osman ve el-Hâc Hüseyin Ağa ve İzzet Ağa ve Eyüb ve el-Hâc Hâfız Abdurrahman Efendi ve diğer İsmail Ağa ve Ömer Efendi ve es-Seyyid Mehmed Ağa ve diğer Ahmed Ağa ve sâirleri meclis-i şer‘-i enverde esnâf-ı mezkûrede el-Hâc Hasan Ağa b. Hüseyin mahzarında merkūm el-Hâc Hasan Ağa enserci esnâfımızdan olur lâkin kendi hâlinde olmayup dâimâ rızâ-i ta‘ahhüde mugāyir mahalde bulunduğundan mâ‘adâ şürût-ı nizâmımızın hilâfı dahi hareket ve ol vechile ihtilâl-i nizâmımızı mûcib ef‘âle tasaddî eylediğinden kendüye defe’âtle tenbîh olundukta aslâ ısgā etmeyüp yine ef‘âl-i sâbıkāsında ısrâr eylediğinde bundan akdem kethüdâ ve bi’l-cümle ihtiyâr ustalarımız ma‘rifetleriyle li-ecli’t-tedîb dükkânını sedd ve bend ve esnâfımızdan ihrâc eylediğimizde ol dahi rızâsıyla esnâfımızdan hurûc etmişidi el-hâletü hâzihî yine esnâfımıza duhûl murâd etmekle merkūm esnâfımıza duhûl eder ise cümlemizin perîşaniyetimizi mûcib olacağı derkâr olmağla merkūm esnâfımıza duhûl etmeyüp âhar kisbe meşgūl olmak üzere kendüye tenbîh olunmak cümlemizin matlûbumuzdur deyü bi’l-muvâcehe sû-i hâlini ihbâr ile teşekkî ve esnâf-ı mezkûreye duhûl etmemesini istid‘â [82b] etmeleriyle esnâf-ı mezkûrenin ber-vech-i muharrer istid‘âlarına müsâ‘ade-i aliyyeleri husûsu re’y-i âlîlerine menût idüğü İstanbul Mahkemesi’nden huzûr [-ı âlîlerine i‘lâm olundu.] Fî 17 Za sene [12]37