İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 421 Hüküm no: 407 Orijinal metin no: [84b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihânbeyli aşiretinin Anadolu’dan İstanbul’a getirdiği keçilerin kasap esnafına dağıtımı Tevzî‘-i keçi Ma‘rûz[-ı dâ‘î-i devlet-i aliyyeleridir ki] Anadolu cânibinden Cihânbeyli aşîretinden bu def‘a Âsitâne-i aliyyeye dört yüz elli re’s keçi sevk ve tesyîr eden es-Seyyid Ali b. es-Seyyid Feyzullah aşîretleri zabıtı Mustafa Bey tarafından vekîli Ali kethüdâ hâzır olduğu hâlde meclis-i şer‘-i enverde hâlâ kasablar kethüdâsı el-Hâc Hasan Ağa b. el-Hâc Osman muvâcehesinde ber-vech-i muharrer bu def‘a Anadolu cânibinden Âsitâne-i aliyyeye sevk ve tesyîr eylediğim zikr olunan keçiler lühûmunun beher vakıyyesini otuz ikişer ve sakatını beş paraya ben kassabâna vermek üzere ta‘ahhüd eylediğimde yevm-i tevzî‘den kırk bir gün mürûrunda yaftamı vermek ve hâlâ hâssa kasabbaşısı dergâh-ı âlî kapıcıbaşılarından Sa‘âdetlü es-Seyyid el-Hâc Mustafa Ağa’nın inzımâm-ı re’y ve ma‘rifetleriyle dört gün Anadolu celebânı keçisi ve dört gün Rumeli celebânı ağnâmı tevzî‘ etmek ve zikr olunan keçi lühûmunun beher vakıyyesini otuz beşer paraya ibâdullâha bey‘e ve iktizâ eden semenlerini vakt-i tevzî‘den yetmiş bir gün tamamında bana edâya ve bi’l-cümle kasab ustaları ta‘ahhüd eylediklerinde ben dahi râzı oldum deyü tarafeynin takrîr ve tasdîkleri tescîl ve İstanbul Mahkemesi’nden [huzûr-ı âlîlerine i‘lâm olundu.] Fî 15 Z sene [1]237