İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 421 Hüküm no: 408 Orijinal metin no: [84b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pabuççu Mikail v. Lutgı’nin, sadece papuç imal edeceğine babası ve papuççu esnafının kefil olduğu Ma‘rûz[-ı dâ‘î-i devlet-i aliyyeleridir ki] Âsitâne-i aliyye ve bilâd-ı selâsede kâin dikici esnâfından Âsumânî ve Siyah Yahûdi mesti dikicilerin yiğitbaşısı Mosi v. Yako ve esnâfından Hayim v. Nadan ve İlya v. Neftali ve Kamal v. Yasef ve diğer İlya v. Lorşon ve diğer Mosi v. İsak ve İsak v. Avram nâm Yahûdiler ve sâirleri hâlâ Dikicibaşı Ali Ağa ve Başyiğitbaşı Ömer Ağa hâzır oldukları hâlde meclis-i şer‘-i enverde yine dikici esnâfından ve Ermeni tâifesinden Âsumânî ve Siyah Yahûdi Pabûcu dikicilerden Mikail v. Lutgı zimmî muvâcehesinde Yahûdi pabucu dikicilerden babası Lutgı zimmî ile Toma ve Ohannes ve Kerupe zimmîler kezâlik hâzır oldukları hâlde mesfûr Mikail zimmî Âsumânî ve Siyah Yahûdi pabucu dikici olup esnâfımızın beynimizde mer‘î ve mu‘teber olan nizâm-ı kadîmimiz pabuc dikici ustalar mest dikici ustalar ile bir dükkânda şerîk olmayup müstakillen dükkânlarımızda her birimiz san‘atımızı i‘mâl ile ticâret ve kisb etmek[de] iken mesfûr Mikail zimmî bundan akdem yine esnâfımızdan Yahûdi mesti dikici gāib ani’l-meclis İbiş Ağa nâm kimesne ile şerîk olup nizâmımıza mugāyir bi’l-ma‘iyye bir dükkânda müştereken hem mest ve hem pabuc i‘mâl etmeleri esnâfımız beyninde şikāk ve fesâda bâdî ve ihtilâl-i nizâmımıza bâ‘is olmağla şerîki mezbûr ile fesh-i şirket ve müstakillen âhar dükkânda ancak san‘atı olan Yahûdi pabucu i‘mâl etmek üzere mesfûra tenbîh olunmak matlûbumuzdur deyü da‘vâya tasaddî murâd eylediğimizde mesfûr pabucçu Mikail zimmînin ma‘lûmu olup ol vechile esnâfımızın nizâmını tasdîk ve mezbûr İbiş Ağa ile fesh-i şirket edüp fîmâ ba‘d mest dikicilerden bir kimesne ile şerîk olmayup bir dükkânda müstakillen ancak san‘atı olan Yahûdi pabucu i‘mâl ve bey‘ etmek üzere ta‘ahhüd edüp ta‘ahhüdünün hilâfı hareket etmeyeceğine babası ve sâir hâzirûn-ı mesfûrûn pabu[c]cu ustaları tekeffül eylediklerinde biz dahi râzılar olup tarafeyn kat‘-ı nizâ‘ ve bu vechile nizâm-ı kadîmimiz üzere tevâfuk eyledik deyü tarafeynin takrîr ve tasdîkleri tescîl ve İstanbul [mahkemesinden huzûr-ı âlîlerine i‘lâm olundu.] Fî 15 Z sene [1]237