İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 426 Hüküm no: 413 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Agob’un tuhafiyeci dükkânı gediğini Harosima bt. İstefan’a sattığı Tuhafcı ve fincancı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kâin tuhafcı ve fincancı esnâfından Artin v. Agob nâm zimmî meclis-i şer‘-i enverde mahmiye-i mezbûrede Samatya kurbünde Sulumanastır civârında mütemekkine Harosima bt. İstefan nâm Nasrâniyenin sadrı kebîr oğlu ve tarafından husûs-ı âti’l-beyânı tasdîka vekîl-i şer‘îsi Hekim Abraham v. Oseb nâm zimmî muvâcehesinde mahmiye-i mahkiyede Sultan Bâyezid Hân-ı Velî Câmi‘-i şerîfi kurbünde kolluk tahtında çeşme sırasında Hâfız Mehmed Emin dükkânına muttasıl bir bâb tuhafcı ve fincancı dükkânında mevcûde kaleminde kendi ismime mukayyed beyne’l-esnâf gedik tâ‘bir olunur akd-i âti’z-zikrin sudûruna değin işbu yedimde olan bir kıt‘a sûret mûcebince mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl bâtten ve sahîhan bi-safkatin vâhidetin şürût-ı müfsideden ârî bin dört yüz guruş semen-i makbûza müvekkile-i mesfûre Harosima Nasrâniyeye bey‘ ve temlîk ve teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ ba‘d dükkân-ı mezkûr derûnunda mevcûde gedik tâ‘bir olunan âlât-ı lâzıme-i ma‘lûmede benim kat‘an alâka ve medhalim kalmayup müvekkile-i mesfûre Harosima Nasrâniyenin emvâl-i müşterâtı ve hakk-ı sırfı olmuşdur deyü ba‘de’l-ikrâr ve’t-tasdîk gedik-i mezkûrun kaleminde bâyi‘-i mesfûr ismine olan kaydı ref‘ ve terkīn ve atîk sûreti battâlda hıfz olunarak müşteriye-i müvekkile-i mesfûre Harosima Nasrâniye ismine tasrîhan kayd ve yedine bir kıt‘a sûret i‘tâsı bâbında istid‘â-yı inâyet eyledikleri İstanbul [mahkemesinden huzûr-ı âlîlerine i‘lâm olundu.] Fî 18 Z sene 1237