İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 427 Hüküm no: 414 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rumeli’den İstanbul’a getirilen sığırların kasap esnafına dağıtımı Sığır tevzî‘i Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye arzuhâl takdîm eden vilâyet-i Rumeli’de Plevne kazâsı ahâlîsinden olup Âsitâne-i aliyyeye sürek getiren sığır celebânından bu def‘a üç yüz doksan re’s bakar celb eden Menoğlu el-Hâc İbrahim İbiş Ağa b. Hasan ve iki yüz yetmiş beş re’s bakar sâhibi olan el-Hâc Ahmed Ağa b. el-Hâc İbrahim ve yüz yirmi beş re’s bakar sevk eden Pehlivanoğlu Ali b. Halil ve iki yüz yirmi altı re’s bakar tesyîr eden es-Seyyid Molla Mustafa b. el-Hâc İbrahim ve iki yüz on sekiz re’s bakara mâlik olan Halil b. İbrahim ve yüz yirmi dört re’s bakar götüren İbrahim b. el-Hâc Hasan ve iki yüz on dokuz re’s bakar mâliki olan Mustafa ibn-i el-Hâc Hasan nâm kimesneler meclis-i şer‘-i enverde Âsitâne-i aliyye ve bilâd-ı selâsede kâin sığır kasabları kethüdâsı Derviş Mehmed Ağa b. el-Hâc Osman muvâcehesinde sığır kasabları ustalarından kethüdâ-yı sâbık el-Hâc İbrahim Ağa b. Hüseyin ve Osman Ağa b. Mehmed ve Tophâneli es-Seyyid Ahmed Ağa b. es-Seyyid Halil ve Galatalı Hasan Beşe b. Ahmed ile Yahûdi ustalarından Neftalı v. Mosi ve Mosi v. Menteş ve İlya v. Yasef ve diğer Mosi v. Samarya ve Baryem v. Yasef ve Mayer v. İlya nâm Yahûdiler hâzır oldukları hâlde biz bu def‘a bâlâda tahrîr olunduğu vechile Rumeli cânibinden Âsitâne-i aliyyede Yedikule hâricinde Tokad nâm mahalle sevk ve tesyîr eylediğimiz cem‘an bin beş yüz yetmiş yedi re’s sığırlarımızın lühûmunu beher vakıyyesini altmış dörderer akçeye ve sakatlarını ikişer guruşa sığır kasabları mezbûrûna vermek üzere her birimiz rızâlarımızla ta‘ahhüd eylediğimizde kethüdâ-yı merkūm dahi zikr olunan sığırlarımızdan işbu târih-i i‘lâmdan üç gün mürûrunda bir sürek ve yevm-i mezkûrun haftasında iki sürek ve ba‘dehû itmâmına değin haftada üç sürek tevzî‘ edüp ol vechile tekmîl etmek ve yevm-i tevzî‘den kırk bir gün tamamında yaftalarımızı vermek üzere kethüdâ-yı merkūm Derviş Mehmed Ağa ve lühûm-ı mezkûrenin beher vakıyyesini nizâmları vechile ibâdullâha yetmişer akçeye bey‘ edüp zikr olunan sığırlarımızın iktizâ eden semenlerini vakt-i tevzî‘den altmış bir gün tamamında bize edâya kethüdâ ve esnâf-ı hâzirûn-ı mezbûrûn ta‘ahhüd eylediklerinde her birimiz ta‘ahhüdlerini kabûl ve ol vechile bi’t-terâzî kat‘-ı nizâ‘ eyledik deyü tarafeynin ikrâr ve tasdîkleri tescîl ve İstanbul Mahkemesi’nden [huzûr-ı âlîlerine i‘lâm olundu.] Fî 21 Z sene 1237