İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 432 Hüküm no: 420 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Begos v. Markar’ın mâlik olduğu oda gediğini Kağıtçıbaşı Mehmed Emin Ağa’ya sattığı Han mübâya‘ası ve sûret-i istid‘âsı Ma‘rûz[-ı dâ‘î-i devlet-i aliyyeleridir ki] Sarraf tâifesinden Begos v. Markar nâm zimmî meclis-i şer‘-i enverde hâlâ Kağıtçıbaşı es-Seyyid el-Hâc Mehmed Emin Ağa b. es-Seyyid İbrahim muvâcehesinde mahmiye-i İsyanbul’da merhûm Sultan Bâyezid Hân-ı Velî -tâbe serâhu- hazretlerinin câmi‘-i şerîfleri mürekkebciler kapısında vâki‘ merhûm Yusuf Ağa binâ eylediği ma‘lûmü’l-hudûd bir bâb hanın tabaka-i ulyâsında kâin odalardan tarîk-i hâssa nâzır kenîf açıklığına muttasıl birinci odadan addolundukta üçüncü şehriye yedi guruş kirâlı yedimde olan bir kıt‘a sûret mûcebince akd-i âti’z-zikrin sudûruna değin mâlik olduğum gediklerden bir bâb oda-i mezkûre derûnunda mevcûde gedik tâ‘bir olunur âlât-ı lâzıme-i ma‘lûmeyi tarafeynden bi’l-îcâb ve’l-kabûl şürût-ı müfsideden ârî bâtten ve sahîhan bi-safkatin vâhidetin bin altı yüz elli guruş semen-i makbûza mûmâ-ileyh Kağıtçıbaşı es-Seyyid el-Hâc Mehmed Emin Ağa’ya bey‘ ve temlîk ve teslîm ol dahi yedimden iştirâ ve temellük ve tesellüm ve kabz ve kabûl edüp mebî-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ ba‘d zikr olunan oda gediğinde benim kat’a alâka ve medhalim kalmayup mûmâ-ileyh Kağıtçıbaşı es-Seyyid el-Hâc Mehmed Emin Ağa’nın mâl-ı müşterâsı olmuşdur deyü ba‘de’l-ikrâr ve’t-tasdîk zikr olunan oda gediğinin mersûm Sarraf Begos zimmî ismine olan kayd-ı atîki kaleminden ref‘ ve terkīn ve yedinde olan bir kıt‘a sûretden ifrâzıyla müşteri-i mûmâ-ileyh Kağıtçıbaşı es-Seyyid el-Hâc Mehmed Emin Ağa ismine tasrîhan bir kıt‘a sûret i‘tâ buyrulmak bâbında istid‘â-yı inâyet eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 29 Z sene [12]37