İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 433 Hüküm no: 421 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Mustafa’nın, Yedikule’deki kasap dükkânı gediğini Ebûbekir b. İbrahim’e devrettiği Kasab Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merkūm-ı mağfiret-nişan Sultan Abdülhamid Hân -tâbe serâhu- hazretlerinin evkāf-ı celîlelerinden mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden sekizinci selhhâneye merbût mahmiye-i mezbûrede Cağaloğlunda kâin ma‘lûmü’l-hudûd bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmaye bâ-re’y-i mütevellî mutasarrıf olan kasab ustalarından es-Seyyid el-Hâc İbrahim Ağa b. Mustafa meclis-i şer‘-i münîrde kasab Ebûbekir b. İbrahim nâm kimesne muvâcehesinde kasablar kethüdâsı el-Hâc Hasan Ağa b. el-Hâc Osman hâzır olduğu hâlde bâlâda muharrer mutasarrıf olduğum kasab dükkânı gediği olan vakıf âlât-ı lâzıme-i ma‘lûmemin nısfını tasarrufumda ibkā ve nısf-ı âharını hüsn-i rızâ ve tayyib-i hâtırım ve ferağ-ı mu‘teber-i kat‘î ile bâ-re’y-i mütevellî merkūm kasab Ebûbekir’e ferağ ve tefvîz ve vech-i lâyıkı üzere teslîm eylediğimde ol dahi tefevvüz ve tesellüm ve kabz ve kabûl edüp fîmâ ba‘d nısf-ı âlât-ı muharrer-i mezkûrede benim kat’a alâka ve medhalim kalmayup mezbûr kasab Ebûbekir’in hakk-ı müfevvazı olmuşdur deyü eylediğim takrîrini mezbûr Kasab Ebûbekir tasdîk ve hisse tevzî‘ini kethüdâ-yı merkūm ve ustalar ma‘rifetleriyle tamamen ahz etmek üzere [87a] ba‘de’t-ta‘ahhüd fâriğ-i merkūm es-Seyyid el-Hâc İbrahim Ağa gedik-i mezkûrun tasarrufu içün yedinde olan mütevellî temessükü mukaddemâ harîkde muhterik olup zâyi‘ olmağla kaydı mûcebince zâyi‘den bir kıt‘a temessük i‘tâsından sonra gedik-i merkūmun nısfı temessük-ı merkūmdan ifrâz ile mezbûrun ferağından merkūm Ebûbekir uhdesine kayd-birle tasarrufu içün taraf-ı vakıfdan yedine başka temessük i‘tâsı istid‘âsında oldukları İstanbul Mahkemesi’nden [huzûr-ı âlîlerine i‘lâm olundu.] Fî 29 Z sene [12]37