İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 434 Hüküm no: 422 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniköy’deki kasap dükkânı gediğinin Kosta v. Divro’nun vefâtı üzerine Petro v. Kosta’ya devredildiği Yeniköy’de kasab Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân -tâbe serâhu- hazretlerinin evkāf-ı celîlelerinden mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden onuncu selhhâneye merbût mahrûse-i Galata’ya muzâfe İstinye nâhiyesine tâbi‘ Yeniköy’de Köprübaşında vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur vakıf âlât-ı lâzıme-i ma‘lûmenin rub‘una bâ-temessük-ı mütevellî mutasarrıf olan Kosta v. Divro nâm zimmî bundan akdem hâlik olup zikr olunan âlât-ı lâzıme-i ma‘lûmenin rub‘u sulbî kebîr oğulları Telo ve Petro zimmîler ile sulbiye kebîre kızları Sotire ve Saltana Nasrâniyelere intikāl-ı âdi ile seviyyen ba‘de’l-intikāl kendi nefsinden asıl ve kız karındaşları mersûmetân Sotire ve Saltana Nasrâniyeler taraflarından husûs-ı âtîde vekîlleri olduğu şahıslarını bilir İsiro v. Dodod ve Sava v. Kosta nâm zimmîler şehâdetleriyle ber-nehc-i şer‘î sâbit olan mesfûr Telo zimmî meclis-i şer‘-i enverde karındaşı mesfûr Petro zimmî muvâcehesinde kasablar kethüdâsı el-Hâc Hasan Ağa b. el-Hâc Osman hâzır olduğu hâlde zikr olunan Yeniköy’de Köprübaşında vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur vakıf âlât-ı lâzıme-i ma‘lûmenin rub‘u işbu yedimizde olan bir kıt‘a mütevellî temessükü mantûkunca babamız hâlik-i mesfûr Kosta zimmînin ile’l-helâk tasarrufunda olup ba‘de helâkihi âdiyen ve seviyyen benimle karındaşım mesfûre ve kız karındaşlarım müvekkiletân-ı mersûmetâna ba‘de’l-intikāl ben zikr olunan kasab dükkânı gediğinin rub‘undan dört sehm i‘tibâriyle intikālen mutasarrıf olduğum bir sehmini asâleten ve kız karındaşlarım müvekkiletân-ı mersûmetânın kezâlik mutasarrıfelar oldukları birer sehmlerini vekâleten ki cem‘an rub‘-ı âlât-ı mezkûrenin üç sehmini hüsn-i rızâ ve tayyib-i hâtır ve ferağ-ı mu‘teber-i kat‘î ile bâ-re’y-i mütevellî karındaşım mersûm Petro zimmîye ferağ ve tefvîz ve vech-i lâyıkı üzere teslîm eylediğimde ol dahi tefevvüz ve tesellüm ve kabz ve kabûl edüp fîmâ ba‘d zikr olunan gedik âlâtının rub‘unda benim müvekkiletân-ı mesfûretânın kat‘an alâka ve medhalim kalmayup i‘tibâr-ı mezkûr üzere bir sehmi babamız intikālından ve üç sehmi benimle kız karındaşlarım müvekkiletân-ı mesfûretân ferağlarından karındaşımız mesfûr Petro zimmînin hakk-ı müfevvazı olmuşdur deyü bi’l-asâle ve bi’l-vekâle eylediği ikrâr u i‘tirâfını mesfûr Petro zimmî tasdîk ve hisse tevzî‘i kethüdâ-yı merkūm ve ustalar ma‘rifetleriyle tamamen ahz etmek üzere ba‘de’t-ta‘ahhüd zikr olunan dükkân gediğinden ber-vech-i muharrer rub‘ hisseyi mesfûr Petro zimmî üzerine tahrîr ve temhîr ve yedine taraf-ı vakıfdan temessük i‘tâsı istid‘â olduğu İstanbul Mahkemesi’nden [huzûr-ı âlîlerine i‘lâm olundu.] Fî 29 Z sene [12]37