İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 435 Hüküm no: 423 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icâreli, Yedikule’deki kasap dükkânı gediğinin Kosta v. Diver’ın vefâtı üzerine, Petro v. Kosta’ya devredilmesi Yeniköy’de kasab Ma‘rûz[-ı dâ‘î-i devlet-i aliyyeleridir ki] Hüdâvendigâr-ı esbak cennet-mekân firdevs-âşiyân merhûm-ı mağfiret-nişan Sultan Abdülhamid Hân -tâbe serâhu- hazretlerinin evkāf-ı celîlelerinden mahmiye-i İstanbul’da Yedikule hâricinde vâki‘ gayr-ez selhhâne-i mîrî on aded ganem selhhânelerinden onuncu selhhâneye merbût mahrûse-i Galata’ya muzâfe İstinye nâhiyesine tâbi‘ Yeniköy’de mahkeme karşısında bir bâb ve köprübaşında hamam karşısında bir bâb ve Hızır İlyas Mahallesi’nde bir bâb ve İstinye çarşısında bir bâb ki cem‘an dört bâb kasab dükkânları derûnlarında mevcûde beyne’l-esnâf gedik tâ‘bir olunur vakıf âlât-ı lâzıme-i ma‘lûmelerin rub‘larına bâ-temessük-ı mütevellî mutasarrıf olan Kosta v. Diver nâm zimmî bundan akdem hâlik olup zikr olunan âlât-ı lâzıme-i ma‘lûmelerin rub‘ları sulbî kebîr oğulları Telo ve Petro zimmîler ile sulbiye kebîre kızları Sotire ve Saltana Nasrâniyelere intikāl-ı âdi ile seviyyen ba‘de’l-intikāl kendi nefsinden asıl ve karındaşları mersûmetân Sotire ve Saltana Nasrâniyeler taraflarından husûs-ı âtîde vekîlleri olduğu şahıslarını bilir İsbir v. Dodo ve Sava v. Kosta nâm zimmîler şehâdetleriyle ber-nehc-i şer‘î sâbit olan mesfûr Telo zimmî meclis-i şer‘-i enverde karındaşı mesfûr Petro zimmî muvâcehesinde kasablar kethüdâsı el-Hâc Hasan Ağa b. el-Hâc Osman ve kasab ustalarından es-Seyyid el-Hâc İbrahim Ağa hâzır oldukları hâlde zikr olunan Yeniköy’de mahkeme karşısında bir bâb ve köprübaşında hamam karşısında bir bâb ve Hızır İlyas Mahallesi’nde bir bâb ve İstinye çarşısında bir bâb ki cem‘an dört bâb kasab dükkânları derûnlarında mevcûde gedik tâ‘bir olunur vakıf âlât-ı lâzıme-i ma‘lûmelerin rub‘ları işbu yedimizde olan bir kıt‘a mütevellî temessükü mantûkunca babamız hâlik-i mesfûr Kosta zimmînin ile’l-helâk tasarrufunda olup ba‘de helâkihî âdiyen ve seviyyen benimle karındaşım mesfûre ve kız karındaşlarım müvekkiletân-ı mersûmetâna ba‘de’l-intikāl ben zikr olunan dört bâb kasab dükkânları gediklerinin rub‘larından dörder sehm i‘tibârıyla intikālen mutasarrıf olduğum birer sehmlerini asâleten ve kız karındaşlarım müvekkiletân-ı mersûmetânın kezâlik mutasarrıflar oldukları birer sehmlerini vekâleten ki cem‘an rub‘-ı âlât-ı mezkûrelerin i‘tibâr-ı mezkûr üzere üçer sehmlerini hüsn-i rızâ ve tayyib-i hâtır ve ferağ-ı mu‘teber-i kat‘î ile bâ-re’y-i mütevellî karındaşımız mersûm Petro zimmîye ferağ ve tefvîz ve vech-i lâyıkı üzere teslîm eylediğimde ol dahi tefevvüz ve tesellüm ve kabz ve kabûl edüp fîmâ ba‘d zikr olunan gedikler alaının rub‘larında benim ve müvekkiletân-ı mesfûretânın kat’a alâka ve medhalimiz kalmayup i‘tibâr-ı mezkûr üzere birer sehmleri babamız intikālından ve üçer sehmleri benimle kız karındaşlarım müvekkiletân-ı mesfûretân ferağlarından karındaşımız mesfûr Petro zimmînin hakk-ı müfevvazı olmuşdur deyü bi’l-asâle ve bi’l-vekâle eylediği ikrâr u i‘tirâfını mesfûr Petro zimmî tasdîk ve hisse tevzî‘ini kethüdâ-yı merkūm ve ustalar ma‘rifetleriyle tamamen ahz etmek üzere ba‘de’t-ta‘ahhüd zikr olunan dört bâb dükkânlara gediklerinden ber-vech-i muharrer rub‘ hisseleri mesfûr Petro zimmî üzerine tahrîr ve temhîr ve yedine taraf-ı vakıfdan temessük i‘tâsı istid‘â olduğu İstanbul [mahkemesinden huzûr-ı âlîlerine i‘lâm olundu.] Fî 29 Z sene [12]37