İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 436 Hüküm no: 424 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bükücü esnâfından İzmirli Begos v. Gabril ile kalfası Serkiz v. Avanes’in bir daha nizama aykırı davrandıklarında kürek cezasına çarptırılmayı kabul ettikleri Börüncekçi esnâfının kat‘-ı münâza‘aları Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ börüncekçi esnâfının kethüdâları Hâfız Mehmed Ali Ağa ve Yiğitbaşı Ahmed Usta ve esnâfından Ali Usta ve Süleyman Usta ve Mustafa Usta ve Reşid Usta ve diğer Ali Usta ve diğer Ahmed Usta ve es-Seyyid Mehmed Usta ve Derviş Mehmed Usta nâm kimesneler ile re‘âyâ ustalarından Yiğitbaşı Artin ve Agob ve Mikail ve Acı Melkon ve Ohannes ve Uzun Mıgırdıç ve diğer Melkon nâm zimmîler ve sâirleri meclis-i şer‘-i enverde dolapçı esnâfının kethüdâları Ahmed Usta ve Yiğitbaşı Osman Usta ile esnâfından el-Hâc Ahmed Usta ve es-Seyyid Cafer Usta ve es-Seyyid Mehmed Sâdık Usta ve Ârif Usta ve Hüseyin Usta ve Tahir Usta nâm kimesneler ve sâirleri hâzır oldukları hâlde mahmiye-i mahkiyede meşdûd bükücü esnâfından İzmirli Begos v. Gabril ile kalfası Serkiz v. Avanes nâm zimmîler muvâcehelerinde biz yalın kat börüncek büküp çehre üzerine sardıktan sonra a‘lâ olarak Âsitâne-i aliyyede kâin culha esnâfı ile kazzâz esnâfına ve sâir ibâdullâha bey‘ ile te‘ayyüş edegelür börüncekçi esnâfından olup san‘atımıza âhardan dahl îcâb etmez iken bu esnâda mersûm meşdûd bükücü İzmirli Begos ve kalfası Gabril kendi meşdûduna kanâ‘at etmeyüp bizim san‘atımız olan yalın kat börünceği ahz ve hafiyy menzilde kalb ve redî olarak i‘mâl ve çarh üzerinde ve arşuna alıp hilâf-ı nizâm culha esnâfına ve sâire bey‘ ve ol vechile bizim şürût-ı nizâmımızın ihtilâli ile perîşaniyetimize bâ‘is ve bâdî olduğundan mersûmânın san‘at-ı mezkûremizi i‘mâlden men‘leriyle kendi san‘atları olan meşdûdu büküp te‘ayyüş etmeleri içün kendilere tenbîh olunmak ve eğer ısgā etmezler ise tedîb olunmalarını iltimâs ile şikâyet etmek üzere iken beynimiz ıslâh ve tevfîk olunup mersûmân Begos ve Gabril zimmîler fîmâ ba‘d bizim san‘atımız olan yalın kat ahz u i‘mâl etmemeğe ta‘ahhüd ve eğer hilâf-ı ta‘ahhüd hareket edüp gerek çarh üzerinde ve gerek arşun üzerinde tûra ile i‘mâl eyledikleri börüncek ahz olunur ise vaz‘-ı kürek ile tedîblerine râzılar olduklarında biz dahi ber-vech-i muharrer ta‘ahhüdlerini kabûl ve şikâyetimizi terk eyledik deyü dolapçı esnâfı hâzirûn-ı merkūmûnun tasdîkleriyle eyledikleri takrîrlerini mersûmân İzmirli Begos ve kalfası Serkiz zimmîler dahi ba‘de’t-tasdîk fîmâ ba‘d esnâf-ı mezkûrenin i‘mâl eyledikleri yalın kat börünceği kat’a ahz ve ber-vech-i muharrer çarh ve arşun üzerlerinde çulha esnâfına ve sâire bey‘ etmemek ve kendi san‘atı olan meşdûd bükücülükden gayrı san‘ata müdâhale etme[me]k üzere ta‘ahhüd ve eğer hilâf-ı ta‘ahhüd hareket ederler ise vaz‘-ı kürek ile tedîblerine râzılar olduklarını meclis-i şer‘de bi’l-muvâcehe takrîr ve bu cihetle münâza‘a eyledikleri İstanbul [mahkemesinden huzûr-ı âlîlerine i‘lâm olundu.] Fî 2 M sene [1]238