Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 315 Hüküm no: 341 Orijinal metin no: [53a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zaharya bt. Göne’nin menzilini Ayşe Hatun bt. Abdullah’a satıp kiraladığı Mahmiye-i İstanbul’da Ali Paşa-yı Atîk mahallesinde sâkine olup zâtı ma‘rifet-i şer‘iyye ile ârifân Müezzin Mustafa b. Hasan ve kayyım Ahmed b. Mehmed ta‘rîfleriyle mu‘arrefe olan Zaharya bt. Göne nâm nasrâniye meclis-i şer‘-i şerîf-i enverde mahmiye-i merkūmede Neslişah Sultân mahallesinde sâkine fahrü’l-muhadderât bâ‘isü’l-vesîka Saraylı Ayşe Hâtun bt. Abdullah tarafından husûs-ı âti’l-beyâna vekîl olduğu kezâlik zâtı ma‘rifet-i mezkûrân Mustafa Çelebi ve Ahmed şehâdetleriyle şer‘an sâbit olan fahrü’l-akrân Mehmed Ağa b. Ahmed mahzarında ikrâr ve takrîr-i kelâm edip yedimde mülküm olup zikr olunan Ali Paşa-yı Atîk mahallesinde vâki‘ bir tarafdan Cetayiz zimmî mülkü ve bir tarafdan Sıvacı menzili ve tarafeyni tarîk-i âmla mahdûd bir bâb fevkānî ve bir bâb tahtânî oda ve sofa ve havluyu müştemil mülk ve menzilimi cümle tevâbi‘iyle merkūme Ayşe Hâtun’a altmış beş esedî guruşa bi tarîki’l-istiğlâl bey‘ ve teslîm ol dahi ba‘de’l-iştirâ ve’t-tesellüm meblağ-ı mezbûr altmış beş esedî guruşu mezkûre Ayşe Hâtun’dan bi’t-tamâm ahz u kabz eylediğimden sonra merkūm Ayşe Hâtun menzil-i mezkûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç yüz altmış gün tamâmına değin on bir guruşa bir rub‘u bana îcâr ve teslîm ben dahi istîcâr ve tesellüm eyledim dedikde gıbbe’t-tasdîki’ş-şer‘î merkūm Zaharya’nın oğlu Senir? v. Kuzma nâm zimmî meblağ-ı mezbûr yetmiş beş guruş ve ücret-i menzil-i mezkûre emr ve kabûlü hâviye kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’l-âşir min Recebi’l-ferd li sene seb‘a ve tis‘în ve elf. Şuhûdü’l-hâl: Yençeci Mustafa, Mustafa Çelebi b. İbrahim, Mehmed b. Ömer Ağa b. Nurullah, es-Seyyid Mehmed Efendi el-İmâm, Mehmed b. Mustafa.