Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 316 Hüküm no: 342 Orijinal metin no: [53a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Mustafa’nın câriye satışı ve diğer davalarından Mustafa Çelebi b. Musa ile sulh olduğu Mahmiye-i İstanbul’da Müftü Ali Çelebi mahallesinde sâkine Fâtıma bt. Mustafa nâm hâtun tarafından husûs-ı âti’l-beyâna vekîl-i müsecceli olan Ömer b. Mustafa meclis-i şer‘-i şerîf-i enverde bâ‘isü hâze’l-kitâb Mustafa Çelebi b. Musa mahzarında bi’l-vekâle takrîr-i kelâm ve ta‘bîr ani’l-merâm edip bundan akdem mezbûre Fâtıma Hâtun yediyle câriye-i memlûkesi olup evsâfı beynlerinde ma‘lûm ( ) bt. Abdullah üzerinde setr-i avrat olucak mertebesinden ziyâdesin müvekkilem mezbûreye red etmek üzre semen-i ma‘lûm ve makbûza bey‘ ve teslîm ol dahi iştirâ ve kabz etmişidi hâlâ üzerinde lâbis olduğu esvâbından bir münakkaş ferâce ve bir entari ve bir sagīr ön kuşağı ve bir yaşmak ve canfesi mezbûr Mustafa Çelebi bana red ve teslîm ben dahi bi’l-vekâle yedinden ahz u kabz edip husûs-ı mezbûra ve mahmiye-i mezbûre mahallâtından Âşık Paşa mahallâtında vâki‘ lede’l-ahâlî ve’l-cîrân ma‘lûmü’l-hudûd menzile müte‘allika âmme-i [da‘vâdan ibrâ-i âmm-ı] kātı‘ü’n-nizâ‘la mezbûr Mustafa’nın zimmetini ibrâ eyledim dedikde gıbbe’t-tasdîki’ş-şer‘î mâ vaka‘a ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Abdülkerim Efendi b. Halil, el-Hâc Mehmed b. İsmail, Hüseyin b. İdris, Hüseyin b. Mustafa.