İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 437 Hüküm no: 425 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerîfe Selime Hatun’un yeni bina ettiği menzilinde, İsmail Efendi ve Mehmed Salih Efendi menzilleri tarafına bakan kısımlarını kaldıracağını taahhüt ettiği Keşf-i menzil Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen zikri âtî husûsun keşf ve mu‘âyene ve tahkīki içün savb-ı şer‘-i enverden irsâl olunan başkâtib Mevlânâ İbrahim Ârif Efendi dâ‘îleri hâssa mimarı hulefâsından Mustafa Seydâ ve es-Seyyid Ahmed Nazif halîfeler ile İstanbul’da Aksaray kurbünde Alem Bey Mahallesi’nde vâki‘ mahalle-i mezbûre câmi‘-i şerîfi vakfı müsakkafâtından câmi‘-i şerîf-i mezkûr avlusu derûnunda tarîk-i hasda kâin henüz binâsına şürû‘ olunan bir bâb nâ-tamam menzile varup cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettikte ashâb-ı arzuhâl mahalle-i mezbûre ahâlîsinden olup menzil-i mezkûr karşısında kâin tarîk-i hâs aşırı birbirine muttasıl vakf-ı âhardan olan iki bâb menzilin başka başka mutasarrıfları olan mektûbî-i defterî kalemi küttâbından İsmail Efendi b. el-Hâc Mustafa ve Hakkâk Mehmed Salih Efendi b. Mustafa ve menzil-i mezkûrun ve etrâfına muttasıl olup vakf-ı mezbûr müsakkafâtından olan bir bâb menzilin mutasarrıfı Paçacı Molla Mustafa b. Hasan nâm kimesneler ile menzil-i mezkûr karşısında köşede kâin vakf-ı mezbûr müsakkafâtından olan bir bâb menzilin mutasarrıfesi zâtı mu‘arrefe Kastamonulu Âişe bt. Osman nâm Hatun’dan her biri meclis-i ma‘kūd-ı mezkûrda menzil-i mezkûra mutasarrıfe olan derûn-ı arzuhâlde mezkûretü’l-ism mu‘arrefetü’z-zât Şerîfe Selime bt. Mehmed Sâdık nâm Hatun muvâcehesinde vakf-ı mezbûr mütevellîsi Arabacı ocağının yoklama kâtibi Mustafa Efendi tarafından mürsel vekîli mahalle-i mezbûre imâmı İbrahim Efendi b. Osman hâzır olduğu hâlde mezbûr Şerîfe Selime Hatun yedinde olan mütevellî temessükü mantûkunca terbî‘an altmış beş buçuk zirâ‘ arsa üzerinde mebnî iki direk ebniyeli bir bâb menzilini bu esnâda hedm-birle tarîk-i hass-ı merkūm köşesinden fuzûlî bi-gayr-ı hakkın iki zirâ‘ on beşer parmak mahal ilâvesiyle mimârân-ı mezbûrân mesâhalarıyla terbî‘an altmış sekiz zirâ‘ üç parmak arsa üzerine üç direk olarak on bir buçuk zirâ‘ kaddinde binâ ve inşâ eylediği menzilinin ulyâda kâin ihdâs eylediği bir bâb odasının üç aded pencerelerinden mezbûrân İsmail Efendi ve Mehmed Salih Efendi bizim menzillerimizin makarr-ı nisvân olan mahallerine nezâret ve havâlesini def‘a ve merkūm Molla Mustafa dahi menzil-i mezkûr mâhiyesinin bârân vukū‘unda suyu menzilim kiremidi üzerine cereyân edüp ol vechile zarâr- bîni olmağla zarârını def‘a ve mezbûre Âişe Hatun dahi menzil-i mezkûr saçağının bârân vukū‘unda suyu kezâlik menzilim kiremidi üzerine cereyân edüp ol vechile zarâr-bîni olmağla zarârını def‘a ve sâlifü’l-beyân tarîk-i hass-ı merkūmdan bi-gayr-ı hakkın menziline ilâve eylediği tarîk-i hass-ı merkūm köşesinden iki zirâ‘ beşer parmak mahalli dahi kemâ-kân tarîk olarak terk etmek üzere mezbûre Şerîfe Selime Hatun’a tenbîh olunmak matlûbumuzdur deyü da‘vâ eylediklerini mezbûr dâ‘îleri mahallinde tahrîr ve ma‘an meb‘ûs ümenâ-i şer‘le evvelâ du‘âhâne-i dâ‘îlerinde ve ba‘dehû Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘de tarafeyn muvâcehelerinde mimârân ve mütevellî vekîli mezbûrûn hâzır oldukları hâlde ba‘de’l-inhâ mezbûre Şerîfe Selime Hatun dahi tasdîk ve sâlifü’l-beyân üç aded pencerelerine tahta perde vaz‘ıyla mezbûrân İsmail Efendi ve Mehmed Salih Efendi’nin menzillerine olan nezâretini kat‘an ve sâlifü’l-beyân mâhiye ve saçağın bârân vukū‘unda sularını tarîk-i hass-ı merkūma cereyân içün kendi tabanından oluk vaz‘ıyla zarârlarını def‘a ve tarîk-i hass-ı merkūm köşesinin tarafeyninden on sekiz parmak mahalli tarîk-i hass-ı merkūma terk içün köşede kâin direği ref‘ ve iki aded direk vaz‘ ve üzerlerine eğri vaz‘ıyla köşe mahallini fâriğî olarak açık terk ile ebniye-i mezkûreyi inşâya ta‘ahhüd edüp bu vechile kat‘-ı nizâ‘ eyledikleri İstanbul Mahkemesi’nden [huzûr-ı âlîlerine i‘lâm olundu.] Fî-gurre-i M sene [1]238