İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 444 Hüküm no: 431 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’da Receb Mahallesi’ndeki mescid vakfının imamet cihetinin Seyyid Mehmed ve Seyyid Ahmed’e tevcihi Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olan işbu arzuhâl ve derkenâra nazar olundukta Amasya’da Receb Mahallesi’nde vâki‘ mescid vakfının vazîfe-i mu‘ayyene ile imâmet ciheti sâhibey-i arzuhâl es-Seyyid Mehmed ve es-Seyyid Ahmed halîfeler ibney el-Hâc Hâfız Hasan’ın iştirâken bâ-berât-ı âlîşân üzerlerinde iken hilâf-ı vâki‘ mezbûranın fevtlerini inhâ ile mahlûllerinden bin iki yüz otuz altı senesi Zilhiccesinin on altıncı günü Abdullah Halîfe v. [b.] müteveffâ Seyyid Ahmed’e tevcîh ve ba‘dehû kasr-ı yedinden bin iki yüz otuz yedi senesi Şa‘bânı’nın üçüncü günü bâ-arzuhâl es-Seyyid Hâfız Abdullah Halîfe b. Molla Halil’e tevcîh olunup lâkin sâhibey-i arzuhâl mezbûrân es-Seyyid Mehmed ve es-Seyyid Ahmed Halîfeler imâmet-i mezkûreye mutasarrıflar ve el-yevm hayâtında ve fevtleri gayrı vâki‘ idüğünü beyân ile imâmet-i mezkûre hilâf-ı inhâ ile kendüye tevcîh ettiren Abdullah Halîfe kasr-ı yedinden tevcîh buyrulan mezbûr es-Seyyid Hâfız Abdullah Halîfe’nin ref‘inden kendilere ibkā buyrulmak bâbında istid‘â-yı inâyet eyledikleri mefhûm-ı arzuhâl ve derkenârdan müstebân oldukdan sonra mezbûrân asâleten meclis-i şer‘de dahi ber vech-i muharrer takrîr ve istid‘â eylediklerinde takrîr-i meşrûhları vâkı‘a mutâbık ve fevtleri gayr-ı vâki‘ ve el-yevm hayatdalar ve imâmet-i mezkûrenin bâ-berât-ı âlîşân mutasarrıfları idükleri kazâ-i mezbûr ahâlîsinden ve Züvvârzâde es-Seyyid Ahmed Efendi b. es-Seyyid el-Hâc Hüseyin ve Üveys Beyzâde es-Seyyid Ahmed Efendi ve el-Hâc Ali Ağa ve Abdülkerim Efendi ve Mehmed Efendi ve Ömer Ağa ve Hasan Ağa ve İsmail Ağa ve Mehmed Ağa ve Ahmed Ağa nâm bî-garaz Müslimîn ile rütbe-i tevâtürde sâir ma‘lûmü’l-esâmî kimesneler bi’l-muvâcehe alâ-tarîkı’ş-şehâde haber vermeleriyle zâhir olmağın bu sûretde imâmet-i mezkûre merkūm es-Seyyid Hâfız Abdullah Halîfe b. Halil’in ref‘inden mukaddemâ mutasarrıfları sâhibey-i arzuhâl es-Seyyid Mehmed ve es-Seyyid Ahmed Halîfeler ibney el-Hâc Hâfız Hasan’a ibkāen tevcîh ve yedlerine berât-ı şerîf-i âlîşân sadaka ve ihsân buyrulmak husûsu re’y-i âlîlerine menût idüğü imtisâlen li’l-emri’l-âlî İstanbul Mahkemesi’nden [huzûr-ı âlîlerine i‘lâm olundu.] Fî 4 M sene [1]238