Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 316 Hüküm no: 343 Orijinal metin no: [53a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gevher bt. Abdullah’ın azat ettiği kölesi ve kocası İvaz b. Abdullah’ta alacağı olduğu Mahmiye-i İstanbul’da Yenibahçe kurbunda Karabaş mahallesinde sâkine işbu bâ‘isü’l-kitâb Gevher bt. Abdullah Hâtun ba‘de’t-ta‘rîfi’ş-şer‘î meclis-i şer‘-i şerîfde abd-i mu‘takı ve hâlâ zevci olan İvaz b. Abdullah mahzarında üzerine da‘vâ ve takrîr-i kelâm edip mezbûr İvaz zimmetinde yedimden iştirâ ve kabz eylediği beynimizde ma‘lûm hurdacı metâ‘ı bahâsından yüz esedî guruş hakkım olup hattâ şuhûd mahzarında dahi ikrâr etmişidi hâlâ merkūm İvaz’a suâl olunup meblağ-ı mezbûr yüz esedî guruşu bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr, müdde‘î-i mezbûreden müdde‘âsına muvâfık beyyine taleb olundukda mahalle-i mezbûr sükkânından Müezzin Mehmed Efendi b. Mustafa, Mustafa b. Mehmed b. ve diğer Mustafa b. Mustafa nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ işbu müdde‘iye-i mezbûrenin abd-i mu‘takı ve zevci mezbûr İvaz bundan akdem müdde‘iye-i mezbûre zevcem Gevher Hâtun’a yedinden iştirâ ve kabz eylediğim beynimizde ma‘lûm hurdacı metâ‘ı bahâsından yüz esedî guruş zimmetimde vâcibü’l-edâ deynimdir deyû bizim huzûrumuzda ikrâr ve i‘tirâf etmişdi. Bu husûsa bu vech üzre şâhidleriz şehâdet dahi ederiz her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr yüz esedî guruş müdde‘iye-i mezbûre Gevher Hâtun’a edâ ve teslîme zevci mezbûr İvaz’a ba‘de’ [53b] t-tenbîh mâ vaka‘a bi’t-taleb ketb olundu. Fi’l-yevmi’s-sâbi‘ aşer min Recebi’l-ferd li sene seb‘a ve tis‘în ve elf. Şuhûdü’l-hâl: İbrahim b. Mustafa, Mustafa b. Muharrem, İbrahim b. Ahmed, el-Hâc Mustafa b. Tevekkül.