İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 450 Hüküm no: 436 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa, Humbaracıbaşı İsmail Ağa ve Duhânî Seyyid Memiş Ağa’nın ana yoldan haksız olarak arsalarına kattıkları kısmı geri vererek yaptıkları duvarı kaldırmayı taahhüt ettikleri Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen zikri âtî husûsun mahallinde lede’l-mu‘âyene keşf ve tahkīki içün kıbel-i şer‘den mürsel Kâtib es-Seyyid Mehmed Tahir Efendi ve nezâret-i hazret-i Sadâret-penâhîde âsûde evkāf müfettişi müderrisîn-i kirâm-ı zevi’l-ihtirâmdan Hasan Paşazâde es-Seyyid Ahmed Haydar Beyefendi tarafından mürsel Kâtib Hasan Hasbi Efendi ve mi‘mar-ı hâssa hulefâsından Mustafa Seydâ ve Sâfi Mustafa Halîfeler ile nezâret-i müşârun-ileyhde âsûde evkāfdan Kâşif Mehmed Emin Kethüdâ Evkāfı müsakkafâtından İstanbul’da Çarşambapazarı kurbünde Fethiye Câmi‘-i şerîfi civârında Tercümân Yunus Mahallesinde vâki‘ tarafeyni el-Hâc Selim Ağa ve Na‘lband el-Hâc Hüseyin Ağa menzilleriyle mahdûd bir bâb arsa üzerine varup cerîdede muharrerü’l-esâmî kimesneler huzûrlarında akd-i meclis-i şer‘-i âlî ettiklerinde ashâb-ı arzuhâl Dıraman Mahallesi İmâmı es-Seyyid el-Hâc Ali Efendi b. el-Hâc Hüseyin ve ahâlîsinden Çukadâr Mustafa Ağa b. Abdulkādir ve İpekçi es-Seyyid Derviş Mehmed Ağa b. Ali ve Nakībü’l-eşrâf Başçavuşu es-Seyyid Ali Ağa b. es-Seyyid Mehmed ve Saka Mehmed Beşe b. Mehmed ve Na‘lband el-Hâc Hüseyin Ağa b. Mustafa ve el-Hâc Selim Ağa b. Abdullah ve İbrahim Beşe b. Mustafa ve Beyceğiz Mahallesi ahâlîsinden Yağlıkçı el-Hâc Ahmed Ağa b. Süleyman ve es-Seyyid İbrahim Ağa b. es-Seyyid Mehmed ve Kalaycı Emin Ağa b. İbrahim ve Culha Emin Ağa b. es-Seyyid Mehmed ve Sipâhîzâde Emin Ağa b. Mehmed ve Culha Ahmed Ağa b. Mehmed ve Culha İmâm İsmail b. Mehmed ve Culha Süleyman Usta b. İbrahim ve Salih Efendi b. Mehmed ve Tekfurdağlı Ahmed Ağa b. Ali ve Yazıcı Mahallesi ahâlîsinden Keresteci el-Hâc Ahmed Ağa b. el-Hâc Ahmed ve Fethiye Müeezini Hâfız Ali Efendi nâm kimesneler meclis-i ma‘kūd-ı mezkûrda vakf-ı mezbûrun mütevellîsi Mehmed Tahir Efendi b. Abdulkādir nâm kimesne hâzır olduğu hâlde arsa-yı mezkûrenin bâ-temessük-ı mütevellî bi’l-icâreteyn iştirâken mutasarrıfları derûn-ı arzuhâlde isimleri mastûr sâbıkā Lağımcıbaşı Mustafa Ağa b. Ali ve sâbıkā Humbaracıbaşı el-Hâc İsmail Ağa b. el-Hâc Abdullah ve Duhânî es-Seyyid Memiş Ağa b. Mehmed nâm kimesneler muvâcehelerinde işbu derûnunda akd-i meclis-i şer‘-i âlî olunan arsa-yı mezkûre harîk-i kebîrden berü arsa-yı hâliye kalıp merkūmûn Mustafa Ağa ve el-Hâc İsmail Ağa ve es-Seyyid Memiş Ağa bu esnâda arsa-yı mezkûrenin etrâfına taş duvar inşâ ve bahçe yapmak murâd edüp lâkin arsa-yı mezkûrenin pişgâhında kadîmden tarîk-i âmdan olan mimârân-ı mezbûrân mesâhalarıyla tûlen otuz yedi buçuk zirâ‘ ve tansîfen arzen üç buçuk zirâ‘ bi-hesâb-ı terbî‘i yüz on dokuz zirâ‘ altı parmak sed mahallini bi-gayr-ı hakkın fuzûlî zabt ve arsa-yı mezkûreye ilâve ve temel vaz‘ıyla bir zirâ‘ mikdârı duvar inşâsına şürû‘ edüp ol vechile tarîk-i âmm-ı mezkûru tazyîk ve mârreye bi’l-külliye muzır olmağla sâlifü’z-zikr bi-gayr-ı hakkın arsa-yı mezkûreye ilâve eyledikleri tarîk-i âmmın yüz on dokuz zirâ‘ altı parmak sed mahallinden keff-i yed ve inşâ eyledikleri duvarı ref‘-birle tarîk-i âmm-ı mezkûru kadîmi üzere terke merkūmdan Mustafa Ağa ve el-Hâc İsmail Ağa ve es-Seyyid Memiş Ağa’ya tenbîh olunmak matlûbumuzdur dediklerinde merkūmûn dahi cevâblarında husûs-ı mezkûru mütevellî-i hâzır-ı merkūm ile tasdîk ve zikr olunan [90b] yüz on dokuz zirâ‘ altı parmak sed mahallini inşâ olunan duvarı ref‘-birle tarîk-i âmm-ı mezkûra terk etmek üzere ta‘ahhüd edüp bu vechile kat‘-ı nizâ‘ eylediklerini kâtibân-ı merkūmân dâ‘îleri mahallinde tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîr eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 9 M sene [1]238