İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 452 Hüküm no: 438 Orijinal metin no: [90b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Süleyman Ağa b. Mehmed’in, çubukçu esnâfına olan borcuna Alemdâr Mustafa Ağa b. Ali’nin kefil olduğu Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hazret-i şehinşâhîye takdîm olunan işbu arzuhâlde tahrîr olunduğu üzere Âsitâne-i aliyye -sânehullâhu te‘âlâ ani’l-âfât ve’l-beliyye-de kâin çubukçu esnâfının Kethüdâları Mehmed Tahir Ağa b. el-Hâc Süleyman ve Yiğitbaşı es-Seyyid Hâfız Ahmed Ağa b. Abdullah ve Yazıcı es-Seyyid İbrahim Ağa b. es-Seyyid Osman nâm kimesneler sâbıkā esnâf-ı merkūme kethüdâsı Ali Ağa b. Abdullah hâzır olduğu hâlde evvelâ Çarşamba günü arz odasında huzûr-ı hazret-i Sadâret-penâhîde ve ba‘dehû du‘âhânemizde ma‘kūd [91a] meclis-i şer‘-i enverde esnâf-ı mezkûreden sâhib-i arzuhâl Uzun Süleyman Ağa b. Mehmed nâm kimesne muvâcehesinde sene-i sâbıkā Şevvâli’l-mükkeremi’nin on birinci günü târihiyle müverrah ve İstanbul Bâb mahkemesi nâibi müderrisîn-i kirâmdan fazîletlü Mustafa Nazif Efendi hatmiyle mahtûm bir kıt‘a i‘lâm-ı şer‘î mantûkunca mezbûr Uzun Süleyman Ağa zimmetinde mâl-ı şirketimizden ve semen-i mebî‘-i makbûzdan ve hâzır-ı mezbûr sâbık kethüdâ Ali Ağa havâlesinden cem‘an alacak hakkımız olan dört bin yüz otuz bir guruşun bin yüz otuz bir guruşunu mezbûr Uzun Süleyman Ağa bize edâ ve teslîm biz dahi yedinden ahz ü kabz etmemizle zimmetinde bâkī bize deyni olan üç bin guruşu dahi hâlâ ve def‘aten edâya kudreti olmayup ber-vech-i âtî mukassatan edâ etmek üzere istimhâl eylediğinde biz dahi meblağ-ı bâkī-i mezbûr üç bin guruşu işbu târih-i i‘lâmdan on beş ay tamamına değin beher şehr ikişer yüz guruş verüp edâ etmek üzere imhâl ve te’cîl ve taksît eylediğimizde ol dahi ecl-i mezkûru kabûl eyledi dediklerinde merkūm Uzun Süleyman Ağa meblağ-ı bâkī-i mezbûr üç bin guruş zimmetinde mezbûrûna deyni olduğunu ikrâr ve ecel-i mezkûru kabûl ve müddet-i mezkûre tamamına değin ber-vech-i muharrer mukassatan edâya ta‘ahhüd edüp meblağ-ı bâkī-i mezbûr üç bin guruşa mahmiye-i mezbûrede Sultan Bâyezid kurbünde kahveci hâzır bi’l-meclis Alemdâr Mustafa Ağa b. Ali nâm kimesne dahi bi’l-emr ve’l-kabûl mukassatan kefîl bi’l-mâl ve dâminim deyü bi’l-muvâcehe ikrâr u i‘tirâf eylediği İstanbul Mahkemesi’nden [huzûr-ı âlîlerine i‘lâm olundu.] Fî 4 M sene [1]238