İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 453 Hüküm no: 439 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffâf Kirkor v. Bedros’un, Seyyid Mustafa Ağa’ya kalan borcunu ödemesi gerektiği Ma‘rûz[-ı dâ‘î-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan işbu arzuhâlde mastûrü’l-ism ve vilâyet-i Anadolu’da vâki‘ Ankara kazâsı re‘âyâsından ve ticâret ile mahrûse-i Bursa mütemekkinlerinden olan Haffâf Kirkor v. Bedros nâm zimmî Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde mahrûse-i mezbûre ahâlîsinden olup bin iki yüz otuz iki senesi Zilhicceti’ş-şerîfesi hılâlinde fevt olan Erzurumlu es-Seyyid el-Hâc Mehmed Ağa b. Ali’nin verâseti sulbî kebîr oğlu es-Seyyid Mustafa Ağa ve sulbiye sagīre kızı Şerîfe Fâtıma’ya ba‘de’l-inhisâr sagīre-i mezbûre Şerîfe Fâtıma’nın li-ebeveyn er karındaşı ve tesviye-i umûruna bâ-hüccet vasiyy-i mensûbu sâhib-i arzuhâl mezbûr es-Seyyid Mustafa Ağa muvâcehesinde bin iki yüz otuz dört senesi mahrûse-i mezbûrede haffâflar sûkunda vâki‘ dükkânında mâlımdan mezbûr es-Seyyid Mustafa Ağa’ya safka-i vâhide ile bey‘ ve teslîm ol dahi yedimden iştirâ ve kabz eylediğim ma‘lûmü’l-aded Diyârbekir alacası ve Musul çenberi semenlerinden mezbûr es-Seyyid Mustafa Ağa zimmetinde yedi bin beş yüz guruş alacak hakkım olmağla meblağ-ı mezbûr yedi bin beş yüz guruşu mezbûr es-Seyyid Mustafa Ağa’dan taleb ederim deyü ba‘de’d-da‘vâ ve’l-istintak mezbûr es-Seyyid Mustafa Ağa cevâbında sene-i merkūmede müdde‘î-i mesfûrun mâlından ve yedinden zikr olunan ma‘lûmü’l-aded Diyârbekir alacası ve Musul çenberini safka-i vâhide ile ancak yedi bin yüz otuz dört guruşa iştirâ ve kabz eylediğini ikrâr ziyâde üç yüz altmış altı guruş müdde‘âsını inkârından mâ‘adâ babam müteveffâ-i mezbûr Erzurumlu es-Seyyid el-Hâc Mehmed Ağa b. Ali’nin hayâtında mâlından müdde‘î-i mesfûr Kirkor zimmîye bey‘ ve teslîm ol dahi yedinden iştirâ ve kabz eylediği emti‘a-i mütenevvi‘a-yı ma‘lûme esmânından mesfûr Kirkor zimmî zimmetinde on yedi bin beş yüz guruş alacak hakkı olup kable’l-ahz fevt oldukda meblağ-ı mezbûr benimle vasîsi olduğum kız karındaşım sagīre-i mezbûreye mevrûs oldukdan sonra mesfûr Kirkor zimmî mâlından zikr olunan Diyârbekir alacası ve Musul çenberini deyn-i mezkûrunun ancak yedi bin yüz otuz dört guruşuna takāsen bana bey‘ ve teslîm ben dahi yedinden bi’l-verâse ve bi’l-vesâye iştirâ ve kabz ve meblağ-ı merkūmu deyn-i mezkûrunun ol mikdârına mahsûb etmemizle meblağ-ı mezbûr on yedi bin beş yüz guruşdan zimmetinde bâkī on bin üç yüz altmış altı guruşunu dahi mesfûrdan taleb ederim deyü ba‘de’d-def‘ ve’d-da‘vâ ve’l-istintak müdde‘î-i mesfûr Kirkor zimmî dahi cevâbında meblağ-ı merkūm on yedi bin beş yüz guruş semen-i mebî‘-i mezkûrdan müteveffâ-i mezbûr Erzurumlu es-Seyyid el-Hâc Mehmed Ağa’ya mukaddemâ zimmetinde deyni olduğunu ikrâr lâkin mukaddemâ deynim olan meblağ-ı merkūm on yedi bin beş yüz guruşu müteveffâ-i mezbûr Erzurumlu es-Seyyid el-Hâc Mehmed Ağa’ya hayâtında fevtinden dört ay mukaddem bin iki yüz otuz iki senesi Şâ‘bânü’l-mu‘azzamı’nın yirminci gününde edâ ve teslîm ol dahi yedimden kabz edüp bi’l-cümle hukūk-ı şer‘iyyeye müte‘allika âmme-i da‘vâdan her birimiz âharın zimmetini kabûlü hâvî ibrâ ve iskāt dahi etmemizle ol vechile meblağ-ı mezkûrdan külliyen zimmetim berîe olmağla merkūm yedi bin beş yüz guruşu hâlâ taleb ederim deyü meblağ-ı mezbûr on yedi bin beş yüz guruşda eylediği def‘ini mezbûr es-Seyyid Mustafa Ağa bi’l-verâse ve bi’l-vesâye külliyen ba‘de’l-inkâr mesfûr Kirkor zimmî ber-vech-i meşrûh ziyâde üç yüz altmış altı guruş müdde‘âsını ve def‘-i meşrûhunu ba‘de’l-istimhâl ve’l-imhâl müddet-i mihel-i şer‘î tamam olup şâhidleri dahi olmadığı ikrârıyla zâhir oldukda ityân-ı beyyineden ızhâr-ı acz edüp mezbûr es-Seyyid Mustafa Ağa’yı ancak bi’l-verâse ve bi’l-asâle kendi hakkında tahlîfe dahi tâlib olmamağla mûcebiyle mesfûr Kirkor zimmî meblağ-ı mezbûr üç yüz altmış altı guruş ziyâde ve meblağ-ı mezbûr on yedi bin beş yüz guruşu müteveffâ-i mezbûre hayâtında edâ ve mübâra’a ile eylediği da‘vâ ve def‘-i meşrûhlarıyla mezbûr es-Seyyid Mustafa Ağa’ya bilâ-beyyine-i âdile mu‘ârazadan [91b] ba‘de’l-men‘ tarafeynin ikrârlarıyla lâzım gelen meblağ-ı mezbûr yedi bin yüz otuz dört guruş meblağ-ı merkūm on yedi bin beş yüz guruşun ol mikdârına takāsen tezyîl olunduktan sonra meblağ-ı mezbûr on yedi bin beş yüz guruşdan bâkī meblağ-ı merkūm on bin üç yüz altmış altı guruş ikrârı mûcebince mesfûr Kirkor zimmîden tahsîl ve bi’t-taleb asıl ve vasiyy-i mezbûr es-Seyyid Mustafa Ağa’ya teslîm olunmak lâzım geldiği İstanbul Mahkemesi’nden [huzûr-ı âlîlerine i‘lâm olundu.] Fî 5 Za sene [1]237