İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 455 Hüküm no: 440 Orijinal metin no: [91b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa, Ayşe Hatun ve Habibe Hatun’un Irgat pazarındaki manav dükkânı gedik âlâtı davasının reddedildiği Irgat pazarında manav dükkânından gedik âlâtının nısfını ihrâc davâsının bâ-emr-i âlî men‘i Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mezkûr İstanbul’da Irgad Pazarı nâm mahalde kâin tarafeyni yemenici ve yazıcı dükkânları ve bir tarafı Tevekkül Hanı ve bir tarafı tarîk-i âm ile mahdûd şehriye otuz akçe icâre-i müecceleli bir bâb vakıf manav dükkânından üç sehm i‘tibâriyle bir sehmine bi’l-icâreteyn mutasarrıf olan Mustafa Ağa ve bir sehmine kezâlik mutasarrıfe olan kız karındaşı mu‘arrefetü’z-zât Âişe Hatun veledey el-müteveffâ el-Hâc Hasan asâleten li-ebeveyn er karındaşları sagīr Mehmed Kâmil’in vâlidesi ve vasiyy-i mansûbesi kezâlik zâtı mu‘arrefe Habibe Hatun bt. Mustafa vesâyeten hâzıra olduğu hâlde Çarşamba günü arz odasında huzûr-ı hazret-i Sadâret-penâhîde ma‘kūd meclis-i şer‘-i enverde zikr olunan bir bâb manav dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin nısf-ı şâyi‘ine bâ-hüccet-i şer‘iyye şirâen mâlike olup dükkân-ı mezkûrun müşâhereten müsteciresi olan sâhibe-i arzuhâl zâtı mu‘arrefe âhar Âişe nâm-ı diğer Emine Hatun bt. Halil muvâcehesinde zikr olunan bir bâb manav dükkânı ber-vech-i muharrer islâsen bizimle karındaşımız sagīr-i mezbûr Mehmed Kâmil’in bi’l-icâreteyn bâ-re’y-i mütevellî tasarrufmuzda ve derûnunda mevcûde beyne’l-esnâf gedik tâ‘bir olunur manav âlât-ı lâzıme-i ma‘lûmesinin nısf-ı şâyi‘i babamız müteveffâ-i mezbûr el-Hâc Hasan Ağa b. Ali’nin ile’l-vefât yedinde mâlı ve mülkü ve ba‘de vefâtihi zevcesi hâzıra-i mezbûre Habibe Hatun ile bize ve karındaşımız sagīr-i mezbûr Mehmed Kâmil’e mevrûs olup ve zikr olunan gedik âlât-ı lâzıme-i ma‘lûmesinin nısf-ı şâyi‘-ı âharı dahi mezbûre Âişe nâm-ı diğer Emine Hatun’un yedinde olan bir kıt‘a hüccet-i şer‘iyye mantûkunca şirâen mâliki ve mülkü ve dükkân-ı mezkûrun şehriye bize i‘tâ olunan yirmi guruş kirâsı ile müsteciresi olup lâkin dükkân-ı mezkûrda müstakillen kaydolunarak gedik i‘tibâri olmayup nısf-ı gedik bizim mülk-i mevrûsumuz ve dükkân-ı merkūm bi’l-icâreteyn tasarrufumuzda ve dükkân-ı merkūmun bize lüzûmu olmağla nısf-ı gedik âlâtını ihrâc ile dükkân-ı merkūmu tahliye ve bize teslîme mezbûre Âişe nâm-ı diğer Emine Hatun’a tenbîh olunmak matlûbumuzdur deyü takrîr-i meşrûhları üzere dükkân-ı merkūmda kendi haklarında nısf-ı gedikde i‘tibâr olunup nısf-ı âharında müstakil kaydolunarak gedik i‘tibârı olmamak üzere ihrâcına tasaddî ile eyledikleri da‘vâları bî-vech idüğü kendilere tefhîm olunduğundan mâ‘adâ dükkân-ı merkūm manav esnâfının hâmiş-i arzuhâle derkenâr olunan emr-i âlide mezkûr diğer fermân-ı âlîşân mûcebince kırk elli seneden berü nizâm-ı kadîmlerinde dâhil mu‘teber gediklerinden olup mülk sâhibleri kirâ-yı kadîmlerini ahz edüp ihrâcına tasaddî olunmadığını başyemiş Pazarbaşısı es-Seyyid Sârim Bey ve manav ustalarından mazbûtü’l-esâmî cem‘-i kesîr Müslimîn bi’l-muvâcehe haber vermeleriyle ol vechile dükkân-ı mezkûrun zikr olunan yirmi guruş kirâ-yı kadîmini ahz-birle derûnunda mevcûde bâ-fermân-ı âlî nizâm-ı esnâfda dâhil idüğü mütehakkık olan gedik âlâtının nısfını ihrâcına mezbûran Mustafa Ağa ve Âişe Hatun ve vasiyy-i hâzıra-i mezbûre Habibe Hatun’un tasaddîleri ber-mûceb-i emr-i âlî men‘ olunmak iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 15 M sene [1]238