İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 456 Hüküm no: 441 Orijinal metin no: [91b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. Bedros’un, Mustafa b. Mehmed’e ibrâdan müstesnâ olan borcunu ödemeyi kabul ettiği Ma‘rûz[-ı dâ‘î-i devlet-i aliyyeleridir ki] Mahrûse-i Bursa ahâlîsinden derûn-ı arzuhâlde mezkûrü’l-ism Erzurumlu oğlu es-Seyyid Mustafa b. es-Seyyid el-Hâc Mehmed nâm kimesne evvelâ Çarşamba günü arz odasında huzûr-ı hazret-i Sadâret-penâhîde ve ba‘dehû du‘âhânemizde ma‘kūd meclis-i şer‘-i enverde sâhibey arzuhâlden Avanes v. Bedros nam zimmî muvâcehesinde bin iki yüz otuz üç senesi hılâlinde medîne-i Balıkesir’de mâlımdan mesfûr Avanes zimmîye bey‘ ve teslîm ol dahi yedimden iştirâ ve kabz eylediği emti‘a-i mütenevvi‘a-yı ma‘lûme semenlerinden mersûm Avanes zimmî zimmetinde alacak hakkım olan yedi bin beş yüz guruşun üç bin guruşunu bana edâ ve teslîm ben dahi yedinden kabz ve istîfâ etmemle bâkī dört bin beş yüz guruş zimmetinde hakkım olup hatta mesfûr Avanes zimmî meblağ-ı bâkī-i merkūm dört bin beş yüz guruş cihet-i mezkûreden zimmetinde bana deyni olduğunu ikrâr dahi etmekle hâlâ taleb ederim deyü da‘vâ eylediğimde ol dahi külliyen inkâr edüp beynimizde ba‘de vukū‘ı’l-münâza‘a bâ-vesâtet-i muslihîn da‘vâ-yı mezkûremden mersûm Avanes zimmî ile an inkâr iki bin beş yüz guruş üzerine ba‘de akdi’l-musâlaha ve’l-kabûl bedel-i sulh-i merkūmdan mâ‘adâ [92a] ziyâdesi olan iki bin guruşa müte‘allika âmme-i da‘vâdan mesfûr Avanes zimmînin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ibrâ-i mezkûru ba‘de’l-kabûl ibrâdan müstesnâ bedel-i sulh-i merkūm iki bin beş yüz guruş zimmetinde bana deyni olduğunu ikrâr ve meblağ-ı merkūmun beş yüz guruşunu işbu târih-i i‘lâmdan on gün mürûrunda ve mâ‘adâ iki bin guruşunu iki sene tamamında bana edâ etmek üzere istimhâl eylediğinde ben dahi imhâl ve te’cîl eyledim deyü ikrâr u i‘tirâfını mersûm Avanes zimmî tasdîk ve ibrâdan müstesnâ bedel-i sulh-i merkūm iki bin beş yüz guruş zimmetinde deyni olduğunu ikrâr ve ber-vech-i muharrer müeccelen edâya ta‘ahhüd eylediği İstanbul Mahkemesi’nden [huzûr-ı âlîlerine i‘lâm olundu.] Fî 27 Za sene [1]237