İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 463 Hüküm no: 449 Orijinal metin no: [93b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Efendi’nin, Kethüda Abdüllatif Ağa b. Mehmed Şâkir’e olan borcunun taksite bağlanarak tecil edildiği Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ şeritçi esnâfının kethüdâsı Abdüllatif Ağa b. Mehmed Şâkir nâm kimesne meclis-i şer‘-i münîrde Bezzâzistanî Mahmud nâm kimesne muvâcehesinde benim mezbûrun zimmetinde semeni kıymetine mu‘âdil bundan akdem yedimden ve mâlımdan iştirâ ve kabz ve istihlâk eylediği bilâ-zarâr tahlîsi mümkün olmayan simden masnû‘ ma‘lûmü’z-zirâ‘ şerit ve kırma kıymetlerinden damânen hakkım olan dört bin dokuz yüz guruş ve benim şerîkim gāib ani’l-meclis şeritçi Kaspar v. Atam zimmî zimmetinde cihet-i karzdan dört bin dokuz yüz guruş alacağım olup şerîkim medyûnum gāib-i mersûm meblağ-ı mezkûr ile beni ol mikdâr medyûnu işbu mezbûr Mahmud Efendi üzerine bundan akdem cümlemiz meclisde iken havâle-i mukayyede-i sahîha-i şer‘iyye ile havâle ve her birimiz havâle-i mezkûreyi kabûl edüp ol vechile cihet-i havâle-i mezkûreden alacağım olan meblağ-ı mezkûr alacağım olan dört bin dokuz yüz guruş ki cem‘an dokuz bin sekiz yüz guruş hakkım olup lâkin mezbûrun meblağ-ı merkūmu hâlâ ve def‘aten edâya iktidârı olmayup ber-vech-i âtî te’cîl ve taksîte tâlib olduğunda ben dahi meblağ-ı mezkûrun rub‘u olan iki bin dört yüz elli guruşunu bin iki yüz otuz sekiz senesi Şa‘bâni’l-mu‘azzamı selhinde ve diğer rub‘u olan iki bin dört yüz elli guruşunu otuz dokuz senesi Cemâziyelevvelîsi selhinde ve âhar rub‘u olan iki bin dört yüz elli guruşunu kırk senesi Saferi’l-hayrı selhinde ve rub‘-ı âharı olan iki bin dört yüz elli guruşunu sene-i mezbûre Zilka‘deti’ş-şerîfesi selhinde cem‘an dört taksît ile mecmû‘unu târih-i i‘lâmdan üç sene tamamına değin tamamen bana edâ ve îfâ etmek üzere rızâmla medyûnum mezbûr Mahmud Efendi’yi te’cîl ve taksît eyledim dedikde ol dahi deyn-i meblağ-ı mecmû‘-ı mezkûr dokuz bin sekiz yüz guruşu ikrâr u i‘tirâf ve ecel-i merkūmu kabûl ve meblağ-ı mecmû‘-ı mezkûr dokuz bin sekiz yüz guruşu ecel-i merkūm hulûlünde ber-vech-i muharrer mukassatan bana edâ ve îfâya ba‘de’t-ta‘ahhüd medyûn-ı mezbûrun kayını işbu hâzır bi’l-meclis Zenâbilîzâde es-Seyyid el-Hâc Abdulkādir Ağa b. es-Seyyid el-Hâc Ali nâm kimesne mezbûr Mahmud Efendi’nin ber-vech-i muharrer bana deyni olan meblağ-ı mecmû‘-ı mezkûr dokuz bin sekiz yüz guruşa tarafeynden bi’l-emr ve’l-kabûl kefâlet-i mutlaka-yı sahiha-i şer‘iyye ile kefîl bi’l-mâl ve dâmin oldu deyü merkūm Abdüllatif Ağa’nın ikrâr u i‘tirâfını mezbûr Mahmud Efendi ve hâzır-ı mezbûr es-Seyyid el-Hâc Abdulkādir Ağa’dan her biri tasdîk ve ikrâr eylediği İstanbul Mahkemesi’nden [huzûr-ı âlîlerine i‘lâm olundu.] Fî 4 Z sene [1]237