İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 471 Hüküm no: 455 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manavî Süleyman Efendi ve eşi Zeliha Hatun’un, evlerine ilave ettikleri saçak, pencere ve kapıyı kapatmayı taahhüt ettikleri Saçak ve pencere ve kapı keşfi Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen zikri âtî husûsun mahallinde lede’l-mu‘âyene keşf ve tahkīki içün taraf-ı dâ‘iyânemden irsâl olunan Kâtib es-Seyyid Mehmed Tahir Efendi bi’l-ma‘iyye rü’yete memûr Haremeyn-i şerîfeyn müfettişi mevâlî-i izâmdan Hatîbzâde Fazîletlü es-Seyyid Mehmed Derviş Efendi tarafından mürsel Kâtib es-Seyyid Mehmed Efendi ve mi‘mar-ı hâssa hulefâsından es-Seyyid Abdulkādir ve diğer es-Seyyid Abdulkādir halîfeler ile nezâret-i dâ‘îlerinde olan evkāfdan Pabucubüyük es-Seyyid Mustafa Efendi Vakfı müstegallâtından İstanbul’da Mesih Ali Paşa Câmi‘-i şerîfi civârında Mîr-i mîrân Hasanpaşa Mahallesi’nde vâki‘ mu‘abbir Hasan Efendi Türbesi karşısında kâin taraf-ı yesârı Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan mârru’z-zikr Mesih Ali Paşa Câmi‘-i şerîfi evkāfı müsakkafâtından Çizmeci Abdurrahman Usta b. İbrahim ile zevcesi Şerîfe Râbia Hatun bt. Salih’in bâ-temessük-ı mütevellî bi’l-icâreteyn iştirâken tasarruflarında olan menzil ve ba‘zan el-Hâc Halil Ağa menzili ve tarafeyni tarîk-i âm ile mahdûd bir bâb bostana varup mazbûtü’l-esâmî Müslimîn huzûrlarında akd-i meclis-i şer‘-i âlî ettiklerinde bostan-ı merkūmun bâ-temessük-ı mütevellî mutasarrıfı sâhib-i arzuhâl medîne-i Üsküdar Mevlevîhânesi’nde Postnişîn es-Seyyid eş-Şeyh Abdullah Necib Efendi b. el-Hâc Mehmed Rûhi b. Abdullah taraflarından husûs-ı âti’l-beyânda vekîl olduğu sâlifü’z-zikr Mesih Ali Paşa Câmi‘-i şerîfi Müezzini el-Hâc Halil Efendi b. Halil ve tarîkat-ı aliyye Mevlevîyyeden Mahmud Dede b. Süleyman nâm kimesneler şehâdetleriyle sâbit olan Selimiye Câmi‘-i şerîfi kayyımı es-Seyyid Abdullah Efendi b. Mustafa nâm kimesne meclis-i ma‘kūd-ı mezkûrda menzileyn-i mezkûreyn mutasarrıfları derûn-ı arzuhâlde ismi mezkûr [96a] merkūm Abdurrahman Usta ve zevcesi mu‘arrefetü’z-zât mezbûre Râbia Hatun ile kezâlik derûn-ı arzuhâlde ismi mezkûr Manavî Süleyman Efendi ve zevcesi mu‘arrefetü’z-zât mezbûre Şerîfe Zeliha Hatun muvâcehelerinde zikr olunan Pabucubüyük Mustafa Efendi Vakfı’nın bi’l-meşrûta mütevellîsi Araycı es-Seyyid Mehmed Hamîd Ağa b. Salih Hüseyin ve mûmâ-ileyh Mesih Ali Paşa Vakfı’nın mütevellîsi hâlâ Haremeyn-i şerîfeyn kalemi Kîsedârı Mehmed Said Efendi b. Mehmed Nuri tarafından mürsel câmi‘-i şerîf-i merkūm İmâmı Zağralı Hâfız Ahmed Efendi b. el-Hâc Ali hâzır oldukları hâlde müvekkil-i mûmâ-ileyhin mutasarrıf olduğu bostan-ı mezkûrun taraf-ı yesârıyla ve etrâfında olan menzileyn-i mezkûreyn bundan akdem ol havâlîde vukū‘ bulan harîkte muhterik olmağla mezbûrûn menzileyn-i mezkûreyni bu def‘a müceddeden binâ ve inşâ edüp lâkin merkūm Abdurrahman Usta ve zevcesi Şerîfe Râbia Hatun binâ eyledikleri menzillerinin damlası bostan-ı mezkûra cârî olan saçağı kadîmden tûlen on buçuk zirâ‘ ve arzen nısf zirâ‘ iken arzen altı parmak ziyâde saçak inşâ eylediğinden mâ‘adâ menzil-i mezkûrun alt katında bostan-ı mezkûra nâzır mimârân-ı mezbûran mesâhalarıyla beheri tûlen yirmi iki parmak ve kadden bir zirâ‘ on beş parmak iki aded pencere ile bostan-ı merkūma açılır kezâlik mimârân-ı mezbûrân mesâhalarıyla arzen bir buçuk zirâ‘ ve kadden iki zirâ‘ üç parmak bir kanatlı kapı ihdâs etmeleriyle zikri mürûr eden saçağın ziyâdesi olan altı parmak mahallini kat‘â ve küşâd eyledikleri muhdes iki aded pencere ile kapı sed ve bende ve menzil-i mezkûrun üst katında kadîmi küşâd olan altı aded pencereler çıkrıkçıkârı parmaklık vaz‘ına zevcân-ı mezbûrân Abdurrahman Usta ve Şerîfe Râbia Hatun’a ve merkūman Manavî Süleyman Efendi ve zevcesi Zeliha Hatun’a dahi binâ eyledikleri menzillerinin duvarından bostan-ı mezkûra açılır ihdâs eyledikleri derûnu parmaklıklı kezâlik mimârân-ı mezbûrân mesâhalarıyla arzen bir zirâ‘ altı parmak ve kadden bir zirâ‘ on sekiz parmak bir kanatlı kapıyı sed ve bende zevcân-ı mezbûrân Süleyman Efendi ve zevcesi Zeliha Hatun’dan her birine tenbîh olunmak bi’l-vekâle murâdımdır deyü da‘vâ ve ol vechile beynlerinde ba‘de vukū‘ı’l-münâza‘a muslihûn tavassutuyla beynleri ıslâh ve tanzîm olunup zevcân-ı mezbûrân Abdurrahman Usta ve Şerîfe Râbia Hatun ancak zikr olunan kapıyı mismârlar ile sed ve bende ve mârru’z--zikr kadîm olan altı aded pencere ile muhdes iki aded pencereler yine çıkrıkçıkârı parmaklık vaz‘ına ve zevcân-ı merkūman Manavî Süleyman Efendi ve Zeliha Hatun dahi ihdâs eyledikleri kapının mimârân-ı mezbûrân ta‘rîfleriyle çıkrıkçıkârı parmaklığın samanlı misillü ağaçdan veçhine bir sıra dahi parmaklık vaz‘ ve ilâvesiyle ol vechile sedd ve bende ta‘ahhüd eylediklerinde müdde‘î-i vekîl-i mezbûr Abdullah Efendi dahi mezbûrûnun ber-vech-i muharrer ta‘ahhüdlerini kabûl ve zikr olunan saçağın altı parmak mahallini kat‘a iki aded pencerelerin bi’l-külliye sedd ü bend müdde‘âsından bi’l-vekâle fâriğ olup bu vechile kat‘-ı nizâ‘ eylediklerini kâtibân-ı mezbûrân mahallinde tahrîr ve ma‘an meb‘ûs ümenâ-i şer‘le meclis-i şer‘a gelüp alâ-vukū‘ihi inhâ ve takrîr eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 20 S sene [1]238