İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 474 Hüküm no: 457 Orijinal metin no: [96b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlid kandilinde cami ve mescitlerin aydınlatılması 238 senesi Mevlüd-i şerîf i‘lâmıdır İstanbul Kādısı fazîletlü efendi İşbu i‘lâmınız rikāb-ı hümâyûn-ı mülûkâneye arz ile meşmûl-i enzâr-ı Cenâb-ı Cihânbâni olmağla mûcebince leyle-i merkūmede îkād-ı kanâdil olunmak üzere iktizâ edenlere tenbîhe mübâderet eyleyesin deyü [buyruldu] Fî 4 Ra sene [1]238 Dergâh-ı cihân-mutâ‘ ve bârgâh-ı sipihr-irtifâ‘a ma‘rûz-ı abd-i dâ‘i-i adîmü’l-istitâ‘alarıdır ki İşbu sâl-ı pür-şeref sene-i semâne ve selâsin ve mi’eteyn ve elf şehr-i Rebî‘ülevveli gurresi rü’yet ile sâbite olamayıp ancak gurre-i mâh-ı Saferi’l-hayr bi’r-rü’ye yevm-i perşembeden idüğü da‘vâ-yı sahîha-i şer‘iyye zımnında şuhûd-ı udûl şehâdetleriyle ber-nehc-i şer‘î sâbite olduğundan şer‘an tekmîl-i selâsin ile gurre-i şehr-i Rebî‘ülevvel yevm-i sebtden mu‘tebere olmağla sebeb-i tekvîn-i âlem bâ‘is-i tevlid-i Benî Âdem Seyyidü’l-enbiyâ ve senedü’l-etkiyâ Muhammedü’l-Mustafa -aleyhi ve alâ-âlihî efdâlü’s-salavât ve ezkâhâ- efendimiz hazretlerinin şeb-i velâdet-i bâ-sa‘âdetleri ber-i‘tibâr-ı mezkûr şehr-i merkūmun on ikinci Çarşamba gecesine tasâdüf etmekle bu ni‘met-i celîle-i uzmânın ızhâr-ı sürûru içün âdet-i hasene-i Devlet-i aliyye ve kā‘ide-i müstahsene-i saltanat-ı seniyye üzere leyle-i mübârekede minârât-ı cevâmi‘ ve mesâcid îkād-ı kanâdil-i nûr-efşân ile tezyîn olunmak bâbında tenbîhi hâvî fermân-ı âlîşân sudûru iktizâ eylediği İstanbul Mahkemesi’nden atebe-i ulyâlarına i‘lâm olundu. Ol bâbda emr ü fermân hazret-i veliyyü’l-emrindir. Fî 2 Ra sene [1]238