İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 474 Hüküm no: 458 Orijinal metin no: [97a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Despino bt. Dimitri v. Sideri’nin, Fırancalacı Sideri v. Mihal ve Dimitri v. İstemat aleyhine açtığı davanın reddedildiği Beşiktaş’a tâbi‘ Arnabud karyesinde vâki‘ bir bâb fırancılacı fırını nizâ‘ına dâir İhrâc şüd fî-6 R sene 1252 Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl Despino bt. Dimitri v. Sideri nâm Nasrâniyenin oğlu ve tarafından husûs-ı âtîde vekîl olduğu şahsını bilir Yanko v. Luka ve Kosti v. Nikola nâm zimmîler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık olan Yani v. Yorgi nâm zimmî bi’l-ma‘iyye rü’yete memûr nezâret-i hazret-i Şeyhülislâmîde âsûde evkāf müfettişi müderrisîn-i kirâm-ı zevi’l-ihtirâmdan Kütahyevîzâde Fazîletlü es-Seyyid Mehmed Ârif Efendi tarafından mürsel Başkâtib Çavuşzâde es-Seyyid el-Hâc Mehmed Salih Efendi hâzır olduğu hâlde meclis-i şer‘-i enverde zikri âtî fırancılacı fırını âlât-ı lâzımesine ber-vech-i âtî bâ-temessük-ı mütevellî mutasarrıflar olan derûn-ı arzuhâlde isimleri mastûr Fırancalacı Sideri v. Mihal ve Dimitri v. İstemat nâm zimmîler muvâcehelerinde nezâret-i hazret-i müşârun-ileyhde âsûde evkāfdan Sadr-ı a‘zam-ı esbak merhûm Halil Hamîd Paşa Vakfı’nın bi’l-meşrûtiyye mütevellîsi vâkıf-ı merhûm-ı müşârun-ileyhin oğlu hâlâ bi’l-fi‘il Rumeli Kazaskeri semâhatlü fazîletlü Mehmed Ârif Beyefendi hazretleri taraflarından mürsel vekîl-i şer‘îleri câbî-i vakf Hâfız Mehmed Tahir Efendi b. Mehmed Emin ile hâlâ ekmekçiler Kethüdâsı Mehmed Efendi b. Ali hâzır oldukları hâlde mahrûse-i Galata’ya muzâfe kasaba-i Beşiktaş’a tâbi‘ Arnavud karyesinde vâki‘ vakf-ı müşârun-ileyh müstegallâtından ma‘lûmü’l-hudûd bir bâb fırancılacı fırını derûnunda mevcûde beyne’l-esnâf fırancılacı gediği tâ‘bir olunur vakıf âlât-ı lâzıme-i ma‘lûme bâ-temessük-ı mütevellî bundan akdem anam müvekkile-i mersûme Despino Nasrâniyenin tasarrufunda ve fırın-ı mezkûrda müstecire iken anam müvekkile-i mersûme Despino Nasrâniye hâmiş-i arzuhâlde muharrer derkenâr nâtık olduğu üzere âlât-ı lâzıme-i mezkûrenin yüz yirmi sehm i‘tibâriyle otuzar sehmi bin iki yüz otuz altı senesi Muharremi’l-harâmının yirminci günü ferağ-ı kat‘î-i mu‘teber ile bâ-re’y-i mütevellî müşârun-ileyh mesfûr Sideri zimmîye ve otuz sehmini sene-i mezbûre Şevvâli’l-mükerremi’nin on beşinci gününde yine ferağ-ı kat‘î-i mu‘teber ile ve altmış sehmini iki bin guruş deyni mukābelesinde ferağ bi’l-vefâ ile yine bâ-re’y-i mütevellî müşârun-ileyh mesfûr Dimitri zimmîye ferağ ve tevfiz onlar dahi tefevvüz ve kabûl edüp ancak âlât-ı mezkûrenin altmış sehmini her ne zamân deyn-i mezkûrunu mesfûr Dimitri zimmîye edâ ederse geri almak üzere maasından kat‘â alâka ve medhali kalmamağla otuzar sehmi mesfûrandan her birinin kat‘iyyen hakk-ı müfevvazları olup ancak anam müvekkile-i mersûme Despino Nasrâniye fırın-ı merkūm derûnunda mevcûde zikr olunan vakıf fırancılacı âlât-ı lâzıme-i ma‘lûmesinden i‘tibâr-ı mezkûr üzere otuzar sehmini mesfûrân Sideri ve Dimitri zimmîlere ferağ-ı katî-i mu‘teber ile ferağ edecek oldukda fırın-ı mezkûrda tabh ve i‘mâl edecekleri fırancıla ticâretinde anam müvekkile-i mesfûreyi teşrîk etmek şartıyla fâriğa olmak üzere evvelâ mukāvele ve ba‘dehû şart-ı mezkûrdan rücû‘ ile ber-i‘tibâr-ı mezkûr otuz sehmini târih-i evvel-i merkūmda mesfûr Sideri zimmîye mütevellî-i müşârun-ileyh huzûrunda bilâ-şart kat‘iyyen ve sahîhan ve otuz sehmini târih-i sâni-i mezkûrda mersûm Dimitri zimmîye kezâlik bilâ-şart kat‘iyyen ve sahîhan ve altmış sehmini yine târih-i sâni-i merkūmda mesfûr Dimitri zimmîye iki bin guruş deyni mukābelesinde vefâen ferağ ve tefvîz eylediğinde mütevellî-i müşârun-ileyh dahi zikr olunan otuzar sehmi mesfûrânın bilâ-şart sahîhan ve kat‘iyyen tasarruflarına ve altmış sehmini vefâen ancak mesfûr Dimitri zimmînin tasarrufuna izin vermişler idi lâkin anam müvekkile-i mersûme Despino Nasrâniye’nin mücerred mesfûrân ile mukaddemâ rücû‘ eylediği şart-ı mezkûr ile ferağ mukāvelelerine binâen ba‘dehû bilâ-şart eylediği ferağ-ı mezkûruna sahîh ve mu‘teber olmamağla âlât-ı lâzıme-i mezkûreden i‘tibâr-ı mezkûr üzere ancak otuzar sehmini medfû‘ları olan bedel-i misillerini geriye ahz ile yine bâ-re’y-i mütevellî anam müvekkile-i mersûmeye ferağ etmek üzere mesfûrân Sideri ve Dimitri zimmîlere tenbîh olunmak bi’l-vekâle matlûbumdur deyü takrîr-i meşrûhu üzere müvekkile-i mersûme şart-ı mezkûrdan rücû‘ edüp ba‘dehû sahîhan ferağını i‘tirâf eder iken eylediği da‘vâsı mesmû‘a olmayup iltifâta şâyân olmadığı vekîl-i mersûm Yani zimmîye ba‘de’t-tefhîm müvekkile-i mersûme Despino Nasrâniye’ye izâfetle mesfûrân Sideri ve Dimitri zimmîlere bî-vech-i şer‘î mu‘ârazadan men‘ olunduğu İstanbul Mahkemesi’nden [huzûr-ı âlîlerine i‘lâm olundu.] Fî 14 S sene [1]238