İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 476 Hüküm no: 459 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu’dan İstanbul’a getirilen koyun ve keçilerin kasap esnafına dağıtımı Tevzî‘-i ağnâm ve keçi Ma‘rûz[-ı dâ‘î-i devlet-i aliyyeleridir ki] Bu def‘a Anadolu cânibinden Âsitâne-i aliyyeye ber-vech-i âtî Karaman ağnâmı ve keçi getiren Erzurum celebânından Bayburtlu Ahmed Efendi ve Elbaş Ahmed ve Osman ve Süleyman oğlu Ahmed Ağa ve Cuma Bey ve Memiş Bey ve Küçük el-Hâc Osman ve Osman Bey ve Ali Bey ve Küçük Mehmed Bey nâm kimesneler Ödemişli Ahmed Ağa hâzır olduğu hâlde meclis-i şer‘-i enverde hâlâ Yedikule kasablar Kethüdâsı el-Hâc Hasan Ağa b. el-Hâc Osman muvâcehesinde kasab esnâfından Hasan Ağa ile esnâf-ı mezkûreden sâir mazbûtü’l-esâmî kimesneler kezâlik hâzır oldukları hâlde biz ve hâzır-ı mezbûr Ödemişli Ahmed Ağa’nın Âsitâne-i aliyyeye sevk ve tesyîr eylediğimiz cem‘an on dört bin dört yüz otuz re’s Karaman ağnâmı ve hâzır-ı mezbûr Ahmed Ağa’nın sevk ve tesyîr eylediği yedi yüz on re’s keçi lühûmunun beher vakıyyesini biz kassabâna otuz ikişer paraya ve ağnâm kuyruğunun beher vakıyyesini elli beşer paraya ve ağnâm ve keçi sakatlarını yirmi beşer paraya vermek üzere ta‘ahhüd eylediğimizde kethüdâ-yı merkūm dahi hâlâ kasabbaşı Dergâh-ı âlî Kapıcıbaşılarından Sa‘âdetlü es-Seyyid el-Hâc Mustafa Ağa’nın inzımâm-ı re’y ve ma‘rifetiyle yevm-i tevzî‘den otuz bir gün tamamında yaftalarımızı vermek üzere ve kassabân dahi altmış bir gün mürûrunda iktizâ eden semenlerini bize edâya ve lühûmun beher vakıyyesine üçer para zammıyla otuz beşer paraya kuyruğun beher vakıyyesine beşer para zammıyla altmış paraya ibâdullâha bey‘e ta‘ahhüd eylediler deyü ikrâr ve tasdîkleri İstanbul Mahkemesi’nden [huzûr-ı âlîlerine i‘lâm olundu.] Fî 27 S sene [1]238