İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 477 Hüküm no: 460 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erbeni bt. Anton, Yazıcı Cuvani Curkoviç ve Manol Askaramanka’nın birbirlerinin zimmetlerini ibrâ ettikleri Ücretden ibrâ Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl mu‘arrefetü’ş-şahs Erbeni bt. Anton nâm Nasrâniye meclis-i şer‘-i münîrde Nemçe re‘âyâsından derûn-ı arzuhâlde ismi mastûr Cuvani Curkoviç v. Anderya nâm müste’men muvâcehesinde Tercümânı İklili hâzır olduğu hâlde ben ücret ile hizmet eder makūleden olmamla bundan akdem sadriye sagīre kızım ve sagīr oğlum Corci ma‘iyyetimde olarak iki sene müddetde gāib ani’l-beled Sakızlı Manol Askaramanka v. Corci nâm zimmî bâzergâne-i mahrûse-i Galata’da kâin mütemekkin olduğu menzilinde talebiyle hizmet eylediğimden sonra mesfûr Manol Askaramanka zimmî rızâmla kızım ve oğlum sagīrân-ı mersûmân ile Cezîre-i Sakız’a gittikte müddet-i mezkûrede hizmetim mukābelesinde müstahikka olduğum ücretimin hesâbını gāib-i mersûmun emriyle yazıcısı olan mersûm Covani Curkoviç müste’men ile rü’yet eylediğimizde müddet-i mezkûrede gāib-i mersûm zimmetinde ücretimden müctemi‘a yedi yüz seksen guruş alacak hakkımın elli guruşunu gāib-i mersûmun yedinden ve üç yüz elli guruşunu yazıcısı mesfûr Covani Curkoviç müste’menden ahz ü kabz edüp ol vechile cem‘an dört yüz guruşunu istîfâ etmemle bâkī üç yüz seksen guruşunu dahi işbu meclis-i şer‘de yazıcı-i mersûm Covani Curkoviç müste’men nakden bana edâ ve teslîm ben dahi yedinden tamamen ahz ü kabz edüp ol vechile mâlımdan gāib-i mersûm Manol Askaramanka zimmînin yedinde kalan ber-mûceb-i defter-i müfredât eşyâ-i ma‘lûme ve sagīrân-ı mezbûrândan mâ‘adâ ancak ücret-i merkūmeden gāib-i mersûm Manol Askaramanka zimmî zimmetinde bir akçe ve bir habbe hakkım kalmayup husûs-ı mezkûra müte‘allika âmme-i da‘vâdan mersûm Yazıcı Cuvani Curkoviç müste’menin dahi zimmetini kabûlünü hâvî ibrâ ve iskāt eyledim deyü ikrâr ve tasdîkleri İstanbul Mahkemesi’nden [huzûr-ı âlîlerine i‘lâm olundu.] Fî 3 Ra sene [1]238