İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 478 Hüküm no: 461 Orijinal metin no: [97b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Karabet’in, Hristo v. Yorgi’ye olan borcunun tecil edildiği 400 guruş te’cîl Ma‘rûz[-ı dâ‘î-i devlet-i aliyyeleridir ki] Mübârek rikāb-ı müstetâb-ı cihânbâniye takdîm olunan işbu arzuhâl ile Hristo v. Yorgi nâm zimmî bi’t-terâzî du‘âhânemizde ma‘kūd meclis-i şer‘-i enverde sâhib-i arzuhâl Serkiz v. Karabet nâm zimmî muvâcehesinde mersûm Serkiz zimmînin derûn-ı arzuhâlde mastûrü’l-ism gāib ani’l-beled Kürkçü Yorgi v. Londari zimmîye mâlından ve yedinden iştirâ ve kabz eylediği ecnâs ve fiyat ve mikdârı beynlerinde ma‘lûm kürk semeninden zimmetinde deyni olan iki bin guruşa bi’l-emr ve’l-kabûl ben kefîl bi’l-mâl ve dâmin olduğumdan sonra meblağ-ı mezbûrun dokuz yüz guruşunu mersûm Serkiz zimmî gāib-i mesfûra ba‘de’l-edâ bâkī bin yüz guruşunu gāib-i mesfûr Yorgi zimmî kefâlet-i mahkiyeme binâen benden ahz etmekle meblağ-ı mezbûr bin yüz guruşu bi’l-mürâca‘a taleb ederim deyü bundan akdem sene-i sâbıkā Muharremi’l-harâmı’nın yirmi beşinci günü târihiyle müverrah ve sâbıkā Mahmud Paşa Mahkemesi nâibi müderrisîn-i kirâmdan Ahmed Necib Efendi’nin hatmini hâvî bir kıt‘a i‘lâm-ı şer‘î mantûkunca mesfûr Serkiz zimmîden da‘vâ eylediğimde ol dahi külliyen inkâr edüp ben ber-vech-i muharrer müdde‘âma şâhidlerim diyâr-ı âharda bulunmağla ikāmet-i beyyine edemeyip bi’t-taleb muvâcehemde mesfûr Serkiz zimmîye yemîn verilmekle da‘vâ-yı mezkûremle mesfûr Serkiz zimmîye bilâ-beyyine mu‘ârazadan men‘ olunmuşdum el-hâletü hâzihî ben şâhidlerime zafer bulub ihzâr etmemle meblağ-ı merkūm bin yüz guruşu hâlâ bi’l-mürâca‘a yine mersûm Serkiz zimmîden taleb ve da‘vâ ve isbât murâd eylediğimde ol dahi kemâ-fi’s-sâbık külliyen ba‘de’l-inkâr muslihûn tavassutuyla da‘vâ-yı mezkûremden [98a] mesfûr Serkiz zimmî ile an inkâr dört yüz guruş üzerine ba‘de akdi’l-musâlaha ve’l-kabûl bedel-i sulh-i merkūmdan mâ‘adâsı olan yedi yüz guruşa müte‘allika âmme-i da‘vâdan mesfûr Serkiz zimmînin zimmetini ibrâ-i âmm-ı sahîh-i şer‘î ile ibrâ ve iskāt eylediğimde ol dahi ibrâ-i mezkûru ba‘de’l-kabûl ibrâdan müstesnâ bedel-i sulh-i merkūm dört yüz guruşu mesfûr Serkiz zimmînin hâlâ def‘aten edâya iktidârı olmamağla meblağ-ı mezbûr dört yüz guruşun iki yüz guruşunu işbu târih-i i‘lâmdan altmış bir gün tamamında ve bâkī iki yüz guruşunu doksan bir gün hitâmında bana edâ etmek üzere te’cîl ve taksît eylediğimde ol dahi ecel-i merkūmu kabûl ve meblağ-ı merkūmu müddet-i mezkûre tamamına değin ber-vech-i muharrer müeccelen ve mukassatan bana edâya ta‘ahhüd eyledi deyü mesfûr Hristo zimmînin ikrâr u i‘tirâfını mesfûr Serkiz zimmî tasdîk ve ibrâdan müstesnâ bedel-i sulh-i merkūm dört yüz guruş zimmetinde deyni olduğunu ikrâr ve ber-vech-i muharrer müeccelen ve mukassatan mersûm Hristo zimmîye edâya ta‘ahhüd edüp bu vechile kat‘-ı nizâ‘ eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 6 Ra sene [1]238