Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 317 Hüküm no: 345 Orijinal metin no: [53b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hanım bt. Ahmed Ağa’nın çeşmeye gelen suyu engellememesi Min mümzâtihî Suyolu hüccetidir Merhûm Kethüdâ Bey Süleyman Paşa vakfı olup mahmiye-i İstanbul’da Kasab İvaz mahalle[sinde] vâki‘ olan çeşmenin meşrûtiyyet üzre bi’l-fi‘l mütevellîsi olan vâkıf-ı müşârün-ileyhin sulbî oğlu fahrü’l-eşbâh Mehmed Bey’in vekîli kāimmakāmı Ahmed Ağa b. Mustafa meclis-i şer‘-i şerîf-i enverde mahalle-i mezbûr sükkânından fahrü’l-muhadderât Râbia Hanım bt. Ahmed Ağa tarafından husûs-ı âti’l-beyâna vekîl-i müsecceli olan el-Hâc Hüseyin b. Ahmed mahzarında üzerine da‘vâ ve takrîr-i kelâm edip mârrü’z-zikr çeşmenin suyu kanavât-ı müsennât-ı mevkūfât [ile] müvekkile-i mezbûrenin menziline muttasıl vakıf su hazînesinden kadîmü’l-eyyâmdan beri çeşme-i mezbûreye cereyân edegelmiş iken hâlâ mezbûre Râbia Hanım mâ-i mezbûrun bir masura mikdârını vakıf su hazînesinden kendi menziline fuzûlen icrâ etmekle vekîl-i mezbûra suâl olunup müvekkilesi mâ-i mezbûrun ke’l-evvel çeşme-i mezbûreye cereyânına mâni‘ olmamak üzre vekîl-i mezbûr[a] tenbîh olunmak matlûbumdur dedikde gıbbe’s-suâl vekîl-i mezbûr el-Hâc Hüseyin cevâbında müvekkile-i mezbûrenin hâlâ mülkü ve hakkı olan menzil-i merkūm müşârün-ileyh Süleyman Paşa’nın hayâtında mülkü olup çeşme-i mezbûru vakf etmezden mukaddem menzil-i mezbûr ve kanavât-ı merkūme yedinde mülkü iken bin yetmiş bir senesinde müşârün-ileyh Paşa menzil-i mezbûru karındaşı Osman Ağa’ya semen-i ma‘lûma bey‘ ve teslîm eyledikde mâ-i mezbûrun bir masurasını dahi menzil-i mezbûr ile ma‘an merkūm Osman Ağa’ya ma‘a kanavâtihî bey‘ ve temlîk ettiğinden sonra merkūm Osman Ağa dahi İzvornik beyi iken vefât eyledikde menzil-i mezbûr taraf-ı mîrîden zabt olunup ba‘dehû merkūme Râbia Hanım’ın zevci merhûm Mehmed Paşa hayâtında bi’l-vekâle menzil-i mezbûru mâ-i mezkûr ile cânib-i mîrîden zevcesi mezbûre Râbia Hanım için kezâlik semen-i ma‘lûma iştirâ ve kabz ve mezbûre Râbia Hanım’a teslîm etmekle mâ-i merkūmun bir masurası menzil-i mezbûr ile ma‘an merkūme Râbia Hanım’ın mülk-i müşterâsı olmuşdur deyû def‘le mukābele edicek gıbbe’l-istintâk ve’l-inkâr vekîl-i mezbûrdan def‘-i mezbûruna muvâfık beyyine taleb olundukda isbât-ı beyyine için istimhâl etmekle mehil-i şer‘î ile imhâl olunup müddet-i mehil münkaziye olup ve vekîl-i mezbûr def‘-i mezbûru isbâtdan âciz olduğundan mâ‘adâ hâlâ su nâzırı Hüseyin Ağa b. Abdullah ve su yolcuları bölükbaşılarından Mahmud b. İbrahim ve Şatır Ali b. Abdullah ve Ahmed b. İbrahim nâm kimesnelerden dahi istikşâf-ı hâl olundukda merkūmûnun her biri fi’l-vâki‘ mârrü’z-zikr çeşme suyu kanavât-ı müsennât-ı mevkūfe ile merkūme Râbia Hanım’ın menziline muttasıl vakıf su hazînesinden kadîmü’l-eyyâmdan beri çeşme-i mezbûreye cereyân edegelmişdir deyû bi’l-muvâcehe alâ tarîki’ş-şehâde haber vermeğin mûcebince müvekkile-i mezbûre Râbia Hanım mâ-i mezbûrun ke’l-evvel çeşme-i mezbûreye cereyânına bilâ-beyân mâni‘ olmamak üzre vekîl-i mezbûr el-Hâc Hüseyin’e ba‘de’t-tenbîh mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Recebi’l-ferd li sene seb‘a ve tis‘în ve elf. Şuhûdü’l-hâl: Süleyman Efendi b. Abdullah el-İmâm, es-Seyyid Musa Efendi müezzin-i mahalle-i mezbûre, Hacı İbrahim Çelebi b. ( ), İbrahim Ağa b. Mehmed Ağa, Veli Efendi b. Kemaleddin, sarrâc Mehmed Halîfe, silahdâr Mustafa Bey b. Abdullah, el-Hâc Ali Ağa b. Süleyman, attâr el-Hâc Ahmed, berber Mustafa Çelebi, terzi Halil Beşe b. Mustafa, Osman Odabaşı, Hasan Ağa b. Abdullah, Mirza b. Abdullah, el-Hâc İshak b. Abdullah, Mehmed Hoca b. Abdullah ve gayruhüm mine’l-huzzâr.