Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 319 Hüküm no: 346 Orijinal metin no: [53b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Enbiya Dede Zâviyesi zâviyedârlığının Abdullah’a ait olduğu Vilâyet-i Anadolu’da Fırat ma‘a Şâmî kazâsında vâki‘ merhûm Enbiyâ Dede zâviyesinde zâviyedâr olan işbu bâ‘isü’l-kitâb Abdullah nâm kimesne saray-ı kāimmakām-ı hazret-i sadr-ı a‘zamîde ma‘kūd meclis-i şer‘-i şerîf-i enverde Karabaş Halil nâm kimesne mahzarında üzerine da‘vâ ve takrîr-i kelâm edip bin seksen senesi Cumâdelâhiresi’nde mârrü’z-zikr zâviyede zâviyedâr olan Hüseyin Dede fevt olup zikr olunan zâviyedârlık kıbel-i Devlet-i aliyye’den bana tevcîh ve inâyet ve yedime berât-ı şerîf-i âlîşân sadaka ve ihsân buyurulup târih-i mezbûrdan beri ber mûceb-i şart-ı vâkıf hizmet-i lâzımeyi edâ ve zâviye-i mezkûrede zâviyedâr iken mezbûr Halil zâviyedârlığı hilâf-ı inhâ ile kendiye tevcîh ettirmekle kazâ-i mezbûrda nâibü’ş-şer‘i’ş-şerîf olan Ahmed Efendi ahvâlimi der-i devlete arz [54a] ettikde mezkûr Halil ref‘ ve zâviyedârlık ke’l-evvel bana tevcîh ve müceddeden yedime berât-ı şerîf-i âlîşân sadaka ve ihsân buyurulduğundan mâ‘adâ bâ fermân-ı âlî husûs-ı mezbûr mahallinden istikşâf dahi olunup mezbûr Halil’in zâviyedârlıkda kat‘â alâkası olmadığı zâhir olmağın hâlâ yedimde olan müte‘addid berât-ı âlîşâna nazar olunup mezkûr Halil bî-vech mu‘âraza etmemek üzre cânib-i şer‘den men‘ olunmak matlûbumdur deyû tuğrâ-yı garrâ-yı sultânî ile mücellâ müte‘addid berât-ı hâkānî ibrâz edip nazar olundukda mezbûr Abdullah bin seksen senesi Cumâdelâhiresi’nden beri zâviye-i mezkûreye zâviyedâr olduğunu nâtık bulunup ve mezbûr Halil’in ta‘arruzunu bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, Mustafa Çelebi b. Abdurrahman, İbrahim Çelebi b. Ahmed, Ali b. Bâli ve gayruhüm mine’l-huzzâr.