İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 484 Hüküm no: 467 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Filibe’de Kanuş nahiyesindeki İsmail Bey Câmi-i şerîfi vakfı tevliyetinin Fâtıma Hanım bt. İsmail Bey’e tevcihi Tevliyet istid‘âsı Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlîlerine imtisâlen işbu arz ve derkenârlara nazar olundukta medîne-i Filibe nevahisinden Kanuş nâhiyesine tâbi‘ Markora karyesinde vâki‘ ashâb-ı hayrâtdan merhûm İsmail Bey Câmi‘-i şerîfi Vakfı’nın tevliyeti bâ-hatt-ı hümâyûn aslah evlâd-ı vâkıfdan Fâtıma Hanım bt. İsmail Bey’in müstakilleten tasarrufunda ve vakf-ı mezkûrun ba‘de ihrâci’l-mesârif ve’l-vazâif fazla-i gallesinin beş humus i‘tibâriyle dört humus sehmi evlâd-ı zükûr-ı vâkıfdan mezbûre Fâtıma Hanım ve bir humus sehmi kezâlik evlâd-ı zükûr-ı vâkıfdan derecede müsâvî Ahmed v. Ümmügülsüm’ün başka başka berât-ı âlîşân ile iştirâken uhdelerinde iken mezbûr Ahmed bu esnâda fevt olup terk eylediği ancak bir nefer sulbiye kebîre kızı diğer Fâtıma Hanım pederi merhûm-ı mezbûr Ahmed’in ber-vech-i muharrer bâ-berât-ı âlîşân uhdesinde olan fazla-i galle-i vakf-ı merkūmun bir humus sehmini mahlûlünden kendüye tevcîh olunmasını istirhâm eylediğini medîne-i mezbûre kādısı mevâlî-i fihâmdan fazîletlü Erzurumî Yusuf Efendi dâ‘îleri işbu mührü mutâbık bir kıt‘a arzıyla i‘lâm etmekle ber-mûceb-i i‘lâm-ı mezkûr ol vechile bâ-şart-ı vâkıf bir humus sehm fazla-i galle-i vakf pederi merkūm Ahmed’in mahlûlünden merkūme diğer Fâtıma Hanım’a tevcîh ve yedine bir kıt‘a berât-ı şerîf-i âlîşân inâyet ve ihsân buyrulmak bâbında fermân-ı âlîleri sudûru re’y-i sâmîlerine menût idüğü İstanbul Mahkemesi’nden [huzûr-ı âlîlerine i‘lâm olundu.] Fî 1 Ra sene [1]238