İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 485 Hüküm no: 468 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihak v. Kalos’un, tuhafiyeci dükkânı gediğini Sahak v. Kirkor’a sattığı Tuhafcı ve fincancı mahzeni bey‘i ve sûret-i istid‘âsı Ma‘rûz[-ı dâ‘î-i devlet-i aliyyeleridir ki] Mahmiye-i İstanbul’da kazgancılar başında merhûm Çelebi Efendi konağı karşısında kâin Anzank zimmî mahzenine muttasıl bir bâb tuhafcı ve fincancı mahzeni derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmeye bâ-sûret mâlik olan Mihak v. Kalos nâm zimmî meclis-i şer‘-i münîrde tuhafcı ve fincancı esnâfından Sahak v. Kirkor nâm zimmî muvâcehesinde zikr olunan bir bâb tuhafcı ve fincancı mahzeni derûnunda mevcûde beyne’l-esnâf gedik tâ‘bir olunur akd-i âti’z-zikrin sudûruna değin bir kıt‘a sûret mantûkunca yedimde mâlım ve mülküm olan âlât-ı lâzıme-i ma‘lûmemi tarafeynden bi’l-îcâb ve’l-kabûl şürût-ı müfsideden ârî bi-safkatin vâhidetin bâtten ve sahîhan üç bin guruşa mesfûr Sahak zimmîye bey‘ ve temlîk eylediğimde ol dahi yedimden iştirâ ve temellük ve tesellüm ve kabz ve semeni olan meblağ-ı mezbûr üç bin guruşu bana def‘ ve teslîm eylediğinde ben dahi yedinden tamamen ahz ü kabz edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ ba‘d zikr olunan tuhafcı ve fincancı gediği tâ‘bir olunur âlât-ı lâzıme-i ma‘lûmede benim kat‘â alâka ve medhalim kalmayup mersûm Sahak zimmînin mâl-ı müşterâsı ve hakk-ı sırfı olmuşdur deyü ba‘de’l-ikrâr ve’t-tasdîk âlât-ı lâzıme-i mezkûrenin kaleminde bâyi‘-i mersûm Mihak zimmî üzerinde olan kaydı ref‘ ve terkīn ve yedinde olan atîk sûreti battâlda hıfz-birle müşteri-i mersûm Sahak zimmî ismine kayd ve şürûtu mûcebince yedine müceddeden sûret i‘tâ buyrulmak bâbında istid‘â-yı inâyet eyledikleri İstanbul Mahkemesi’nden [huzûr-ı âlîlerine i‘lâm olundu.] Fî 11 Ra sene [1]238