Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 319 Hüküm no: 347 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mardile v. Dimitri’nin terekesine İstedoli v. Yanaki’nin vasî tayin edilmesi Mahmiye-i İstanbul’da Parmakkapı kurbunda sâkin boyacı tâifesinden olup bundan akdem düyûnen hâlik olan Mardile v. Dimitri’nin zâhirde vâris-i ma‘rûfu olmayıp düyûn-ı kesîresi olmağla terekesini kabz ve düyûnunu edâya cânib-i şerî‘at-i garrâdan bir vasî nasb ve ta‘yîn olunmak lâzım ve yine tâife-i mezbûreden işbu bâ‘isü’l-vesîka İstedoli v. Yanaki nâm zimmî vesâyet-i mezkûre uhdesinden gelmeğe kādir olduğu zeyl-i kitâbda mektûbü’l-esâmî müslimîn ihbâr etmekle hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri mezbûr İstedoli’yi cânib-i şer‘-i kavîmden vasî nasb ve ta‘yîn ettikde, ol dahi kabûl ve hizmet-i lâzımesin kemâ yenbağī edâyı iltizâm etmeğin işbu vesîka bi’t-taleb ketb olundu. Fi’l-yevmi’s-sâdis ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Mustafa Kethüdâ, es-Seyyid Mustafa Çelebi b. Ali, Mustafa b. Ali, el-Hâc Mustafa b. Tevekkül, üstâd Yusuf b. Mehmed.