İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 51 Hüküm no: 3 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohannes v. Asvador’un fırın ve değirmen gediğini Nikagos’a sattığı Fırın ve değirmen mübâya‘ası Âsitâne-i aliyye ve bilâd-ı selâse ve tevâbi‘lerinde olan ekmekçi esnâfından Ohannes v. Asvador nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm li-eb er karındaşı Nikagos nâm zimmî muvâcehesinde ikrâr-ı tam ve takrîr-i kelâm edip mahrûse-i Galata’ya muzâfe İstinye nâhiyesine tâbi‘ Sarıyer karyesinde vâki‘ ma‘lûmü’l-hudûd dört horoslu bir bâb habbâz değirmeni ve ona merbût bir bâb habbâz fırını derûnlarında mevcûde on altı re’s bârgir i‘tibâriyle beyne’l-esnâf gedik ta‘bîr olunur âlât-ı lâzıme-i ma‘lûmeden on üç re’s bârgir hissesi karındaşım mersûm Nikagos zimmînin ve bir bârgir hissesi kız karındaşım Ane Nasrâniyenin ve iki re’s bârgir hissesi benim iştirâken yedimizde mâlımız ve mülkümüz olmağın ben âlât-ı lâzıme-i ma‘lûme-i mezkûreden akd-i âti’z-zikrin sudûruna değin yedimde mâlım ve mülküm olan sâlifü’z-zikr iki re’s bârgir ve onlara isâbet eden sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin dokuz yüz guruşa karındaşım mersûm Nikagos zimmîye kız karındaşım mersûmenin izniyle bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semeni olan meblağ-ı merkūm iki bin dokuz yüz guruşdan cânib-i mîrîye olan bin iki yüz guruş deynim ile Kapan-ı dakīk tüccârından ma‘lûmü’l-esâmî kimesnelere olan bin guruş deynimi cânib-i mîrîye ve ashâbına edâya karındaşım mersûma emr eylediğimde ol dahi edâya ta‘ahhüd edip ol-vechile semen-i merkūmdan zimmetinde bâkī yedi yüz guruş hakkım kaldıkdan sonra târih-i i‘lâm senesi Şevvâli’l-mükerreminin on ikinci günü târihiyle müvarrah ve sâbıkā Ahî Çelebi Mahkemesi Nâibi Mehmed Sunullah Efendi’nin hatmiyle mahtûm bir kıt‘a i‘lâm-ı şer‘î mantûkunca işbu hâzır bi’l-meclis Hazer v. Mihayil nâm zimmîye semen-i mebî‘-i makbûzdan mahkûmun-bih beş yüz on dört guruş ve cihet-i sâire-i ma‘lûmeden yüz seksen altı guruş ki cem‘an zimmetimde yedi yüz guruş deynim olmağla ben dâyinim hâzır-ı mesfûr Hazer zimmîyi deyn-i mezkûrum ile semen-i mebî‘den bâkī medyûnum olan karındaşım mersûm Nikagos zimmî üzerine deyn-i mezkûr yedi yüz guruşu mesfûra edâ etmek üzere bi’l-muvâcehe havâle-i mukayyede-i sahîha-i şer‘iye ile havâle eylediğimde her biri havâle-i mezkûreyi kabûl edip ol-vechile semen-i mezkûru istifâ etmiş olmamla mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan değirmen ve fırın âlât-ı lâzıme-i ma‘lûmelerinde benim kat‘a alâka ve medhalim kalmayup ber-i‘tibâr-ı merkūm iki re’s bârgir ve onlara isâbet eden sâir âlât-ı lâzıme-i ma‘lûme dahi karındaşım mersûm Nikagos zimmînin mülk-i müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 2 Za sene 1237. Şühûdü’l-hâl: Ekmekçiler Kethudâsı Mehmed Efendi b. Ali, Uncular Kethudâsı el-Hâc Mehmed Ağa b. İbrahim, Sayıcı Bedirzâde el-Hâc İsmail b. Ali, Yiğitbaşı Mehmed Ali Ağa b. Abdullah.