Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 320 Hüküm no: 348 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Ağa b. Mehmed’den miras kalan evin mirasçılar arasında satılması Mahmiye-i İstanbul’da Kürkçübaşı mahallesi ahâlîsinden olup mahrûse-i Edirne’de Murâdiye mütevellîsi iken bundan akdem vefât eden Ahmed Ağa b. Mehmed b. Abdullah’ın verâseti zevceteyn-i metrûketeyni Sâliha bt. Abdullah ve Sâime bt. Abdullah nâm hâtunlara ve sagīre kızı Fâtıma’ya ve vâlidesi Vefârâ bt. [Abd]ullah’ı i‘tâk eden Hatice bt. el-Hâc Hızır’ın oğlu Ahmed Çelebi b. Ali’ye münhasıra ve mes’elesi sekiz sehimden olup sihâm-ı mezbûreden üç sehimi mezkûr Ahmed Çelebi’ye isâbeti tahakkukundan sonra mezbûr Ahmed Çelebi meclis-i şer‘-i şerîf-i enverde sagīre-i mezbûrenin tesviye-i umûru için kıbel-i şer‘den mansûb vasîsi olan bâ‘isü hâze’l-kitâb el-Hâc Süleyman mahzarında ikrâr-ı tâm ve takrîr-i kelâm [edip] mahalle-i mezbûrede vâki‘ bir tarafı tarîk-i âm ve bir tarafı Ali Çavuş mülkü ve bir tarafı Hasan Ağa mülkü ve bir tarafı Hüseyin Ağa mülkü ile mahdûd hâriciyyesi fevkānî iki oda ve bir kahve odası ve bir kenîf ve dehliz ve iki yan sofası ve altında ahır ve bir hizmetkâr odası ve bi’r-i mâ ve havlu ve dâhiliyyesi fevkānî iki oda ve bir sofa ve bir matbah ve bir kiler ve bir kenîf ve mahtab ve cüneyneyi müştemil mülk menzil müteveffâ-yı mezbûrun ile’l-vefât mülkü olup ba‘de vefâtihî bi’l-irsi’ş-şer‘î bize isâbet eyledikden sonra menzil-i mezbûrda olan hisse-i irsiyyemin semen-i misli yedi yüz elli guruş idiği vukūf-ı tâmmı olan bî-garaz müslimîn icmâ‘ ve ittifâklarıyla zâhir ve müte‘ayyin ve sagīre-i mezbûre için hisse-i mezkûreyi malıyla iştirâ her vechile evlâ ve enfa‘ olmağla hisse-i mezkûremi meblağ-ı mezbûr yedi yüz elli esedî guruşa vasiyy-i mezbûr Süleyman Çelebi’ye sagīre-i mezbûre için bey‘ ve teslîm ol dahi sagīre-i mezbûre malıyla sagīre-i mezbûre için bi’l-izni’ş-şer‘î vesâyeten iştirâ ve kabûl ve tesellüm eyledikden sonra semeni olan meblağ-ı mezkûrûn üç yüz guruşundan sagīre-i mezbûrenin zimmetini ibrâ ve mâ‘adâ dört yüz elli guruşu vasiyy-i mezbûr yedinden ahz u kabz eyledim ba‘de’l-yevm menzil-i mezbûrda olan hisse-i irsiyyem sagīre-i mezkûrenin mülk-i müşterâsıdır menzil-i mezbûrda alâka ve medhalim kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Bektaş Ağa, el-Hâc Mahmud Ağa Dîvân çavuşu, bâzirgân el-Hâc Veli, el-Hâc Abdurrahman, el-Hâc İsmail, Üsküdarî Hasan, el-Hâc Murtaza Ağa, el-Hâc Mustafa b. Tevekkül, İbrahim b. Ahmed, Mehmed b. İdris.