Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 321 Hüküm no: 349 Orijinal metin no: [54b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Yorgi v. Kiryako’nun Mustafa b. Mehmed’deki alacağının mirasçısı Yorzan v. Andriye tarafından tahsil edilmesi Vilâyet-i Anadolu’da Torul kazâsına tâbi‘ Herek nâm karye ahâlîsinden olup vilâyet-i Rumeli’nde Kavarine nâm kasabada ticâret üzre iken bundan akdem hâlik olan Kara Yorgi v. Kiryako v. Yorgi nâm zimmînin li eb ammi oğlu ve hasren vârisi olan Yorzan v. Andriye v. Marinzor nâm zimmî meclis-i şer‘-i şerîf-i enverde mahmiye-i İstanbul’da Üskübî mahallesinde sâkin el-Hâc Mustafa b. Mehmed’in şerîki ve tarafından husûs-ı âti’l-beyâna vekîl-i şer‘îsi olan işbu bâ‘isü’l-vesîka el-Hâc İbrahim b. Ali muvâcehesinde ikrâr-ı tâm ve takrîr-i kelâm edip mûrisim mezbûr Kara Yorgi bundan akdem hayâtında kasaba-i merkūmede müvekkil-i mezbûr el-Hâc Mustafa’ya mahmiye-i mezkûrede şerîki mezbûr el-Hâc İbrahim’den almak üzre üç yüz yirmi esedî guruş def‘ ve teslîm ol dahi kabz ve tesellüm edip kable’l-ahz hâlik olmağla meblağ-ı mezbûr irsen bana isâbet etmeğin meblağ-ı mezbûr üç yüz yirmi guruşu mezbûr el-Hâc İbrahim bi’l-vekâle def‘ ve teslîm ben dahi yedinden bi’t-tamâm kabz ve tesellüm eyledim dedikde gıbbe’t-tasdîk mahmiye-i mezbûrede Unkapanı kurbunda sâkin İsmail b. Mehmed ile Yeniçarşıda sâkin kazgancı Moskoye v. Doğdu meclis-i şer‘de mezbûr el-Hâc İbrahim mahzarında her biri ikrâr ve i‘tirâf edip mezbûrânın işbu merkūm el-Hâc İbrahim’den bi’l-verâse kabz eylediği meblağ-ı mezbûr üç yüz yirmi guruşa âhar müstehık zuhûr edip mezbûr el-Hâc İbrahim’den nesne ahz olunursa me’hûzdan mikdârına her birimiz kefîl ve zâmin olduk dediklerinde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim Çelebi [b.] Ahmed, Mehmed Çelebi b. Ahmed, Mehmed Çelebi b. Hüseyin.