İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 71 Hüküm no: 25 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekçi esnafından Dimo v. Aposto’un simitçi ve çörekçi fırını gediğini Kethuda İbrahim Ağa ve kardeşi Mehmed Ağa’ya sattığı Lanka’da simidci ve çörekçi fırını Mahmiye-i İstanbul’da kâin simidci ve çörekçi esnâfından Dimo v. Apostol nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb esnâf-ı merkūme Kethudâsı İbrahim Ağa ve ustalarından karındaşı el-Hâc Mehmed Ağa ibney Mustafa ile esnâf-ı merkūmeden İbrahim Usta b. Mehmed mahzarlarında ikrâr-ı tam ve takrîr-i kelâm edip mahmiye-i mezbûrede Langa nâm mahâlde kolluk ittisâlinde ve ekmekçi fırını karşısında kâin ma‘lûmü’l-hudûd bir bâb simidci ve çörekçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle otuzar sehmden cem‘an altmış sehmi mezbûrân Kethudâ İbrahim Ağa ve karındaşı el-Hâc Mehmed Ağa’nın bâ-hüccet-i şer‘iye mülk-i müşterâları ve mâ‘adâ altmış sehmi akd-i âti’z-zikrin sudûruna değin benim yedimde mâlım ve mülküm olmağla ben âlât-ı lâzıme-i ma‘lûme-i mezkûreden i‘tibâr-ı merkūm üzere yedimde mâlım ve mülküm olan altmış sehm hisse-i şâyi‘a-i mezkûremin on beş sehmini mezbûr Kethudâ İbrahim Ağa’ya bin iki yüz elli guruşa ve on beş sehmini karındaşı mezbûr el-Hâc Mehmed Ağa’ya bin iki yüz elli guruşa ve otuz sehmini mezbûr İbrahim Usta’ya iki bin beş yüz guruşa ki cem‘an beş bin guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bey‘ ve temlik ve vech-i lâyıkı üzere teslîm eylediğimde onlar dahi ber-vech-i muharrer yedimden iştirâ ve temellük ve tesellüm ve kabz ü kabûl ve semenleri olan meblağ-ı mecmû‘-ı mezkûr beş bin guruşu bana def‘ ü teslîm eylediklerinde ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin i‘tibâr-ı merkūm üzere altmış sehm-i şâyi‘ında benim kat‘a alâka ve medhalim kalmayup ber-minvâl-i muharrer on beş sehmi mezbûr Kethudâ İbrahim Ağa’nın ve on beş sehmi karındaşı mezbûr el-Hâc Mehmed Ağa’nın ve otuz sehmi mezbûr İbrahim Usta’nın mâl-ı müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 25 Za sene [1]237. Şühûdü’l-hâl: Sultan Mehmed’de İnce Mehmed Usta, Dikilitaşlı Süleyman Usta, Maslak’da Çörekçi Kızıl Mehmed Usta, Yazıcı Ali Efendi, Yiğitbaşı Mehmed Usta Ayvansaraylı Mehmed Usta, Sarâchânebaşı’nda Ömer Usta, Küçükkaraman’da es-Seyyid Ali Usta.