İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 72 Hüküm no: 26 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. İsmail’in kuruyemişci dükkânı gediğini Seyyid Mehmed Ağa b. Seyyid Mustafa’ya sattığı Kuruyemişci Mahmiye-i İstanbul’da kâin kuruyemişci esnâfından Mehmed Ağa b. İsmail nâm kimesne meclis-i şer‘-i hâtır-ı lâzımü’t-tevkīrde dergâh-ı âlî -dâme mahfûfen bi’l-me‘âlî- yeniçerilerinin elli altı bölük ortasında başyasakçı olan işbu bâ‘isü’l-kitâb es-Seyyid Mehmed Ağa b. es-Seyyid Mustafa nâm kimesne mahzarında ikrâr-ı tam ve takrîr-i kelâm edip mahmiye-i mezbûre Zindân kapısı hâricinde Çardakönü nâm mahâlde vâki‘ Mostıra dükkânı demekle ma‘rûf ma‘lûmü’l-hudûd bir bâb kuruyemişci dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye irsen ve şirâen mâlik olduğum kuruyemişci âlât-ı lâzıme-i ma‘lûmesinin dört sehm i‘tibâriyle iki sehmini semen-i ma‘lûm ve makbûza mezbûr es-Seyyid Mehmed Ağa’ya bundan akdem bâ-hüccet-i şer‘iye bey‘ ü temlik etmemle mâ‘adâ akd-i âti’z-zikrin sudûruna değin yedimde bâkī iki sehm-i şâyi‘ının bir sehmini yedimde ibkā ile bir sehmini dahi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin beş yüz guruşa mezbûr es-Seyyid Mehmed Ağa’ya bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan gedik âlâtının dört sehm i‘tibâriyle iki sehmi mukaddemâ ve bir sehmi hâlâ şirâen cem‘an üç sehm-i şâyi‘ı mezbûr es-Seyyid Mehmed Ağa’nın mülk-i müşterâsı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî selh-i Za sene [1]237. Şühûdü’l-hâl: Hasan Yazıcı b. Hüseyin, Yiğitbaşı Mustafa Ağa [b.] Hasan, Kethudâ Mustafa Ağa [b.] Halil, Uzun Mehmed Ağa b. Hasan, el-Hâc Veliyüddin Ağa b. Mehmed, es-Seyyid el-Hâc Ahmed Ağa b. Ali, es-Seyyid Mehmed Yazıcı b. Ahmed, Bayramoğlu Mustafa b. Ahmed, Bayramoğlu Ahmed b. Ahmed.