İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 73 Hüküm no: 27 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. İsmail’in kuruyemişci dükkânı gediğini Ahmed Yazıcı b. Abdullah’a sattığı Kuruyemişci Mahmiye-i İstanbul’da kâin kuruyemişci esnâfından Mehmed Ağa b. İsmail nâm kimesne meclis-i şer‘-i hatîr-i lâzımü’t-tevkīrde esnâf-ı mezkûreden işbu bâ‘isü’l-kitâb Ahmed Yazıcı b. Abdullah nâm kimesne mahzarında dergâh-ı âlî -dâme mahfûfen bi’l-me‘âlî- yeniçerilerinin elli altı bölük ortasında başyasakçı olan es-Seyyid Mehmed Ağa b. es-Seyyid Mustafa nâm kimesne hâzır olduğu hâlde ikrâr-ı tam ve takrîr-i kelâm edip mahmiye-i mezbûrede Zindân kapısı hâricinde Çardakönü nâm mahâlde vâki‘ Mostıra dükkânı demekle ma‘rûf ma‘lûmü’l-hudûd bir bâb kuruyemişci dükkânı derûnunda mevcûde beyne’l-esnâf gedik ta‘bîr olunur bâ-hüccet-i şer‘iye irsen ve şirâen mâlik olduğum kuruyemişci âlât-ı lâzıme-i ma‘lûmesinin dört sehm i‘tibâriyle iki sehmini mukaddemâ ve bir sehmini işbu târih-i hüccet günü semen-i ma‘lûm ve makbûza bâ-hüccet-i şer‘iye hâzır-ı merkūm es-Seyyid Mehmed Ağa’ya bey‘ ü temlik etmemle mâ‘adâ yedimde bâkī akd-i âti’z-zikrin sudûruna değin mâlım ve mülküm olan bir sehm-i şâyi‘ının dahi hâzır-ı mezbûrun izin ve icâzetiyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr Ahmed Yazıcı’ya iki bin beş yüz guruşa bey‘ ve temlik ve vech-i lâyıkı üzere teslîm eylediğimde ol dahi yedimden ber-vech-i muharrer iştirâ ve temellük ve tesellüm ve kabz ve kabûl ve semeni olan meblağ-ı merkūm iki bin beş yüz guruşu mezbûr Ahmed Yazıcı bana def‘ ve teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d zikr olunan âlât-ı lâzıme-i ma‘lûmenin bir sehminde dahi benim kat‘a alâka ve medhalim kalmayup mezbûr Ahmed Yazıcı’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî-selh-i Za sene [12]37. Şühûdü’l-hâl: Hasan Yazıcı b. Hüseyin, Yiğitbaşı Mustafa Ağa b. Hasan, Kethudâ Mustafa Ağa b. Halil, Uzun Mehmed Ağa b. Hasan, el-Hâc Veliyüddin Ağa b. Mehmed, es-Seyyid el-Hâc Ahmed Ağa b. Ali, es-Seyyid Mehmed Yazıcı b. Ahmed, Bayramoğlu Mustafa b. Ahmed, Bayramoğlu Molla Ahmed b. Ahmed.