İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 74 Hüküm no: 28 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Kozma’nın bakkal dükkânı gediğini Mustafa Ağa b. Osman’a sattığı Bakkāl Mahmiye-i İstanbul’da kâin bakkāl esnâfından Andon v. Kozma nâm zimmî meclis-i şer‘-i hatîr-i lâzımü’t-tevkīrde esnâf-ı mezkûreden işbu bâ‘isü’l-kitâb Mustafa Ağa b. Osman nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Tekfursarayı kurbünde Molla Aşkī Mahallesinde vâki‘ Hacı Hüseyin dükkânı demekle ma‘rûf ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur bir destgâh ve bir kantar ve iki terâzî ma‘a derâhim ve bir çekmece ve sâir âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın ve altmış sehmi benim yedimizde şâyi‘an mâlımız ve mülkümüz olmağın ben âlât-ı lâzıme-i mezkûreden ber-i‘tibâr-ı merkūm akd-i âti’z-zikrin sudûruna değin yedimde mâlım ve mülküm olan altmış sehm hisse-i şâyi‘a-i mezkûremi şerîk-i âharım izni ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç yüz guruşa mezbûr Mustafa Ağa’ya bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm üç yüz guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı << ve iskāt >> sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i merkūmenin i‘tibâr-ı mezkûr üzere altmış sehm-i şâyi‘ında benim kat‘a alâka ve medhalim kalmayup mezbûr Mustafa Ağa’nın mâl-ı müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 27 Za sene [1]237. Şühûdü’l-hâl: Kâtib Ahmed Efendi, Bölükbaşı Abdi, Pazarbaşı Süleyman Ağa ve gayruhum.