İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 76 Hüküm no: 30 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pandeli v. Yorgi’nin fırancalacı fırını gediğini borcuna karşılık Ahmed Reşid Efendi b. Hüseyin’e rehin bıraktığı Sîmkeşhâne kurbünde fırancalacı rehni Mahmiye-i İstanbul’da kâin fırancalacı esnâfından Pandeli v. Yorgi nâm zimmî meclis-i şer‘-i hatîr-i lâzımü’t-tevkīrde bâ‘is-i hâzihi’l-vesîka el-Hâc Ahmed Reşid Efendi b. Hüseyin tarafından husûs-ı âti’l-beyânı tasdîka vekîl-i şer‘îsi hâlâ ekmekçiler kethudâsı Mehmed Efendi b. Ali mahzarında ikrâr-ı tam ve takrîr-i kelâm edip mahmiye-i mezbûrede Sîmkeşhâne kurbünde Hasan Paşa Hanı ittisâlinde vâki‘ başmuhâsebe kaleminde mukayyed ma‘lûmü’l-hudûd bir bâb fırancalacı fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibâriyle üç sehmi âharın ve bir sehmi bâ-hüccet-i şer‘iye benim yedimde mâlım ve mülküm olmağın ben âlât-ı lâzıme-i mezkûreden i‘tibâr-ı merkūm üzere yedimde mâlım ve mülküm olan bir sehm hisse-i şâyi‘amı evvelâ zikri âtî istikrâz ve kabz edeceğim meblağ ile bir sene müeccelen iştirâ edeceğim sâ‘atler semenleri mukābillerinde müvekkil-i mûmâ-ileyh el-Hâc Ahmed Reşid Efendi’ye rehin vaz‘ ve vech-i lâyıkı üzere teslîm ol dahi irtihân ve kabz ü kabûl ettikden sonra mâlından bana altı bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semenleri işbu târih-i vesîkadan bir sene tamamına değin müeccel ve mev‘ûd yine müvekkil-i mûmâ-ileyhin mâlından ve yedinden iştirâ ve kabz eylediğim iki aded hilâlî sâ‘at semenlerinden dahi yedi yüz yirmi guruş ki min-haysü’l-mecmû‘ altı bin yedi yüz yirmi guruş ciheteyn-i merkūmeteynden zimmetimde müvekkil-i mûmâ-ileyh el-Hâc Ahmed Reşid Efendi’ye vâcibü’l-edâ deynimdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 Za sene [1]237. Şühûdü’l-hâl: Uncular Kethudâsı el-Hâc Mehmed Ağa, Yiğitbaşı İbrahim Efendi, Bedirzâde el-Hâc İsmail Ağa, el-Hâc İbrahim Ağa, Fırancalacı Aci Yani, Fırancalacı Yorgi v. Manol.