İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 76 Hüküm no: 31 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pandeli v. Yorgi’nin, Yorgi v. Manol’a borcunu ödeyerek rehin bıraktığı eşyaları geri aldığı Rehniyetden fekk Târih-i asl-ı hüccet fî 15 L sene [1]231 Der-zaman-ı Mehmed Said hafîd-i Halil Efendizâde Fırancalacı esnâfından derûn-ı hüccetde mastûrü’l-ism Yorgi v. Manol nâm zimmî meclis-i şer‘-i enverde yine esnâf-ı mezkûreden kezâlik derûn-ı hüccetde mersûmü’l-ism işbu hâmilü’r-rakīm Pandeli v. Yorgi nâm zimmî muvâcehesinde ikrâr-ı tam ve takrîr-i kelâm edip derûn-ı hüccetde tahrîr olunduğu üzere mahmiye-i İstanbul’da Sîmkeşhâne kurbünde Hasan Paşa Hanı ittisâlinde vâki‘ başmuhâsebe kaleminde mukayyed ma‘lûmü’l-hudûd bir bâb fırancalacı fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin dört sehm i‘tibâriyle üç sehmi âharın ve bir sehmi mukaddemâ mesfûr Pandeli zimmînin yedinde mâlı iken mesfûr Pandeli zimmî âlât-ı lâzıme-i mezkûreden i‘tibâr-ı merkūm üzere mâlik olduğu bir sehm hisse-i şâyi‘a-i merkūmesini derûn-ı hüccetde tastîr olunduğu sûret-i kat‘îde iki bin guruş semen-i makbûza bana bey‘ ü temlik ve vech-i lâyıkı üzere teslîm ve tağrîr ve gabnine müte‘allika da‘vâdan her birimiz âharın zimmetini kabûlü hâvî ibrâ eylediğimizi huzûr-ı hâkimü’ş-şer‘de ikrâr edip ben dahi tasdîk etmişdim lâkin bey‘-i mezkûr hakīkatte bey‘ olmayıp meblağ-ı mezkûr iki bin guruş mesfûr Pandeli zimmînin zimmetinde karzan bana deyni ve zikr olunan bir sehm hisse-i şâyi‘ası meblağ-ı mezbûr mukābilinde yedimde rehin olmak üzere beynimizde mukāvele ve işhâd ve ba‘dehû huzûr-ı hâkim-i mûmâ-ileyhde muvâza‘aten bey‘ ve tağrîr ve gabninden ibrâ ve kabûlümüzü ikrâr ve tasdîk etmemizle el-hâletü hâzihî mesfûr Pandeli zimmî ber-vech-i meşrûh cihet-i karzdan zimmetinde deyni olan meblağ-ı mezbûr iki bin guruşu bana edâ ve teslîm ben dahi yedinden ahz ü kabz ve istifâ-i hâk edip mukābilinde zikr olunan [7b] fırancalacı fırını derûnunda gedik ta‘bîr olunur âlât-ı lâzıme-i mezkûreden ber-i‘tibâr-ı mezkûr yedimde rehin olan bir sehm hisse-i şâyi‘asını rehniyetden fekk ve mesfûr Pandeli zimmîye redd ü teslîm eylediğimde ol dahi yedimden ahz ü kabz edip fîmâ-ba‘d meblağ-ı mezbûr iki bin guruşdan mesfûr Pandeli zimmî zimmetinde bir akçe ve bir habbe hakkım ve âlât-ı lâzıme-i mezkûrenin i‘tibâr-ı merkūm üzere bir sehminde benim kat‘a alâka ve medhalim kalmayup mesfûr Pandeli zimmînin kemâ-fi’s-sâbık mâlı ve mülkü ve hakk-ı sırfıdır dedikde gıbbe’t-tasdîki’l-mu‘teber [mâ vaka‘a bi’t-taleb ketb olundu.] Fî 24 Za sene [1]237. Şühûdü’l-hâl: Uncular Kethudâsı el-Hâc Mehmed Ağa [b.] el-Hâc İbrahim, Yiğitbaşı İbrahim Efendi, Bedirzâde el-Hâc İsmail [b.] Ali, Fırancalacı Aci Yani v. Mihal, Fırancalacı diğer Yorgi v. ( ).