İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 77 Hüküm no: 32 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İncici Paşova v. İlya’nın kuyumcu dükkânı gediğini Folyana bt. Kigork’a sattığı Kuyumcu Mahmiye-i İstanbul’da kâin cevâhirci tâifesinden İncüci Paşova v. İlya nâm Yahûdî meclis-i şer‘-i hatîr-i lâzımü’t-tevkīrde mahmiye-i mezbûrede Samatya kurbünde mütemekkine bâ‘isetü’s-sifr Folyana bt. Kigork Nasrâniye tarafından husûs-ı âti’l-beyânı tasdîka vekîl-i şer‘îsi Mıgırdıç v. Sarab nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede Çarşı-yı Kebîr’de kuyumcular içinde kâin Şerbetçi sokağının kolancılar tarafından duhûlde sol cânibinden addolundukda beşinci olan şehriye iki guruş kadîm kirâlı bir bâb kuyumcu dükkânı derûnunda mevcûde akd-i âti’z-zikrin sudûruna değin yedimde mâlım ve mülküm olan beyne’l-hıref gedik ta‘bîr olunur âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile müvekkile-i mesfûre Folyana Nasrâniyeye bin dört yüz guruşa bey‘ ü temlik ve teslîm eylediğimde ol dahi yedimden ber-minvâl-i muharrer iştirâ ve temellük ve tesellüm ve kabz ü kabûl ve semeni olan meblağ-ı merkūm bin dört yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâka ve medhalim kalmayup müvekkile-i mesfûre Folyana Nasrâniyenin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 25 Za sene [1]237. Şühûdü’l-hâl: Kethudâ Ali Ağa, Muhzır Hüseyin, Muhzır Hasan, Muhzır Molla Halil, Mütevellî Takfor, Nâzır Bedros, Nâzır Sekyas, Nâzır Serope.