Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 321 Hüküm no: 350 Orijinal metin no: [54b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pehlivan Tekkesi’nde Duacı Hasan b. Ali’nin ailesiyle ikamet ettiği Güleşçiler hüccetidir. Pehlivan tâifesinden Pehlivan Ali b. Ma‘den ve Pehlivan Mustafa ve Pehlivan Mehmed Bey b. Eyyûb ve Pehlivan Mustafa b. Mehmed ve Pehlivan Ramazan b. Receb nâm kimesneler meclis-i şer‘-i şerîf-i enverde her biri takrîr-i kelâm ve ta‘bîr ani’l-merâm edip mahmiye-i İstanbul’da Hızır Bey mahallesinde vâki‘ pehlivanlara meşrûta olan tekyede mâ tekaddemden nisvân tâifesi sâkin olmayıp zikr olunan tekye mürûr-ı eyyâmla münhedim olmağla du‘âcı Hasan b. Mustafa ta‘mîr üzre iken tekye-i mezbûrede vâki‘ pehlivanların sâkin olduğu bir köhne odada iyâli ile sâkin ve atîk duvarını delip bir kuyu ihdâs etmişdir savb-ı şer‘den üzerine varılıp husûs-ı mezbûra vukūf-ı tâmmı olan mahalle-i mezbûreden istihbâr ve haberleri tahrîr olunmak matlûbumdur deyip husûs-ı mezbûr için fermân-ı şerîf dahi ibrâz etmeleriyle imtisâlen-leh savb-ı şer‘den irsâl olunan Ebûbekir Efendi zikr olunan tekyeye varıp zeyl-i kitâbda muharrerü’l-esâmî müslimîn huzûrlarında husûs-ı mezbûru vukūf-ı tâmmı olup mahalle-i mezbûre ahâlîsinden olan Durmuş b. Hasan ve Hasan Abidin ve Hüseyin b. Abdullah ve el-Hâc Mehmed b. Receb ve el-Hâc Osman b. Mehmed ve Şaban b. İsmail ve Yusuf b. Mehmed ve Ahmed Çelebi b. Memi ve Hüseyin b. Hasan ve Mustafa b. Ali ve Hasan b. Mehmed ve Hasan b. İbrahim ve sâirlerinden suâl eyledikde anlar dahi fi’l-hakīka işbu tekyede ve köhne odada mâ tekaddemden aslâ nisvân tâifesi sâkin olmayıp pehlivan tâifesi sâkin olagelmişdir deyû mezbûrun muvâcehesinde haber verip ve mezbûr du‘âcı Hasan atîk duvarı delip bir kuyu ihdâs eylediği mu‘âyene ve müşâhede olunmağın vâki‘ hâli Mevlânâ-yı mezbûr mahallinde tahrîr ba‘dehû ba‘s olunan el-Hâc Ahmed b. el-Hâc Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hasan Haseki b. Mehmed el-Mübâşir, Ali Halîfe b. Abdullah, Yusuf Ağa b. Abdullah, Mehmed Çelebi b. Hasan, İbrahim Çelebi [b.] Ahmed.