Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 322 Hüküm no: 351 Orijinal metin no: [54b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mehmed’in evinin sarnıcına müdahale edilmemesi Mahmiye-i İstanbul’da Topkapısı dâhilinde Kürkçübaşı mahallesinde sâkine olup zikri âtî menzile vâzı‘ü’l-yed olduğu lede’ş-şer‘i’l-enver zâhir ve müte‘ayyin olan işbu bâ‘isü’l-kitâb Fâtıma Hâtun bt. Mehmed tarafından husûs-ı âti’l-beyâna vekîl olup zât-ı mezbûreyi ma‘rifet-i şer‘iyye ile ârifân olan Mehmed b. Yusuf ve Mustafa b. Abdullah nâm kimesneler şehâdetleriyle şer‘an vekâleti sâbite olan el-Hâc Ahmed b. Ömer nâm kimesne meclis-i şer‘-i şerîf-i enverde hâlâ Şehremini olan umdetü’l-eşbâh Musa Ağa tarafından vekîl-i müsecceli olan Abdullah Ağa b. Mustafa mahzarında bi’l-vekâle üzerine da‘vâ ve takrîr-i kelâm edip mahalle-i mezbûrede vâki‘ bir tarafı ba‘zan Mustafa Çelebi ve ba‘zan Abdullah Çelebi mülkleri ve bir tarafı yine mezbûr Abdullah Çelebi mülkü ve bir tarafı tarîk-i hâs ile mahdûd bir fevkānî oda ve bir sofa ve bir mahtab ve cüneyne ve bir su sarnıcını muhtevî menzil Ayşe bt. Murad ve Safiye bt. [55a] Abdullah nâm hâtunlar mûrisleri olup menzil-i mezbûr yirmi beş seneden mütecâviz mâlikâne zabt ve tasarruf eden es-Seyyid Ahmed Ağa’dan müntakil mülk ve hakları olup bir mikdâr zamân tasarruflarından sonra müvekkile-i mezbûre Fâtıma Hâtun işbu yedinde olan hüccet-i şer‘iyye nâtıka olduğu üzre semen-i ma‘lûma bey‘ ve teslîm ol dahi iştirâ ve kabûl ve teslîm-i semen edip menzil-i mezbûr mârrü’l-beyân sarnıcı ve sâir tevâbi‘ ve levâhıkı ile müvekkile-i mezbûrenin mülk ve hakkı iken mezbûr Abdullah Ağa zikr olunan sarnıc kimesnenin tasarrufunda olmamak üzre müdâhaleden hâlî değildir suâl olunup bî-vech ta‘arruzdan men‘ olunması matlûbumdur deyip mazmûnu takrîr-i meşrûha mutâbık hüccet-i şer‘iyye dahi ibrâz etmeğin gıbbe’s-suâl mezbûr Abdullah [cevâbında] fi’l-hakīka mârrü’z-zikr sarnıc menzil-i mezbûrun müştemilâtından olup menzil-i mezbûr ilâ yevminâ hâzâ mülkiyyet üzre zabt olunduğunu tav‘an ikrâr ve vekîl-i mezbûrun cemî‘ kelimât-ı meşrûhasın tasdîk ve tahkīk etmeğin mûcebiyle mezbûr Abdullah Ağa bî-vech mu‘ârazadan men‘ olunup mâ vaka‘a bi’t-taleb ketb olundu. Fî evâhiri Recebi’l-ferd li sene seb‘a ve tis‘în ve elf. Şuhûdü’l-hâl: Mehmed Odabaşı b. Ahmed, Mehmed b. Yusuf, Mustafa b. Abdullah, Hasan b. Ali, İbrahim Çelebi [b.] Ahmed.