İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 88 Hüküm no: 44 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Usta b. Süleyman’ın simitçi fırını gediğini Halil, Selim ve Salih Ustalara’a sattığı Vezneciler’de simidci fırını Mahmiye-i İstanbul’da kâin simidci esnâfından olup hâlâ vilâyet-i Rumeli’nde Debre kazâsında sâkin Hüseyin Usta b. Süleyman nâm kimesne tarafından husûs-ı âti’l-beyânı ikrâra vekîl olduğu esnâf-ı merkūmeden Alacahamamlı Alemdar Mehmed Usta b. Zeynelabidin ve Kantarcılarlı Mustafa Usta b. Hüseyin nâm kimeseneler şehâdetleriyle ber-nehc-i şer‘î sâbit olan Ayasofyalı İslâm Usta b. Hasan nâm kimesne meclis-i şer‘-i şerîf-i enverde bâ‘isü’l-kitâb kensi nefsinden asıl ve li-ebeveyn er karındaşları Halil ve Selim ve Salih Ustalar ebnâ-i diğer İslâm taraflarından husûs-ı âti’l-beyânı tasdîka vekîl-i şer‘îleri Hasan Usta nâm kimesne mahzarında bi’l-vekâle ikrâr-ı tam ve takrîr-i kelâm edip müvekkil-i merkūm Hüseyin Usta mahmiye-i İstanbul’da Sultan Bâyezid-i Veli Câmi‘-i şerîfi kurbünde Vezneciler nâm mahâlde kâin helvacı ve tütüncü dükkânları beynlerinde vâki‘ bir bâb simidci fırını derûnunda mevcûde beyne’l-hıref gedik ta‘bîr olunur simidci âlât-ı lâzıme-i ma‘lûmesinin yüz yirmi sehm i‘tibâriyle on beş sehmi benim içün İslâm Usta’nın ve otuz sehmi İsmail ve otuz sehmi Ali ve on beş sehmi Yusuf ve on beş sehmi asıl ve müvekkilûn-ı mezbûrûn Hasan ve Halil ve Selim ve Salih Ustaların ve on beş sehmi kendi nefsi içün benim yedimizde mâlımız ve mülkümüz olmağın ben âlât-ı lâzıme-i mezkûreden akd-i âti’z-zikrin sudûruna değin ber-i‘tibâr-ı merkūm mâlik olduğum on beş sehm hisse-i şâyi‘a-i mezkûremi şürekâ-i sâirem izinleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile asıl ve müvekkilûn-ı mezbûrûndan Halil ve Selim ve Salih ve Hasan Ustalara bin üç yüz elli guruşa bey‘ ü temlik ve vech-i lâyıkı üzere teslîm eylediğimde onlar dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin üç yüz elli guruşu bana def‘ ü teslîm ben dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini [10a] kabûlü hâvî ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin on beş sehm-i şâyi‘ında benim kat‘a alâka ve medhalim kalmayup asıl ve müvekkilûn-ı mezbûrûn Hasan ve Halil ve Selim ve Salih Ustaların iştirâken mâl-ı müşterâları ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 6 Z sene [1]237. Şühûdü’l-hâl: Muhzır Molla Mahmud, Kethudâ İbrahim Ağa [b.] Mustafa, Yiğitbaşı Mehmed Usta [b.] Osman, Yazıcı Ali Efendi [b.] Süleyman, Çörekçi Selim Efendi [b.] Abdullah.