Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 323 Hüküm no: 352 Orijinal metin no: [55a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Osman Çavuş’un evini Habib Çelebi b. İslâm’a sattığı Husûs-ı âti’z-zikrin mahallinde ketb u tahrîri için bi’l-iltimâs savb-ı şer‘-i enverden irsâl olunan keşşâf Mehmed Efendi [b.] İbrahim fi’l-asl vilâyet-i Rumeli’nde Bosna eyâletinde Graceste kazâsında Modic nâm kasaba sükkânından olup hâlâ Dârü’l-hilâfeti’l-aliyye Kostantıniyye el-mahmiyye’de Dülgerzâde mahallesinde mütemekkine Fâtıma Hâtun bt. Osman Çavuş’un menziline varıp zeyl-i rakīmde isimleri terkīm olunan müslimîn huzûrlarında akd-i meclis-i şer‘-i hatîr eylediklerinde zâtı ma‘rifet-i şer‘iyye ile ârifân Ahmed Ağa b. Kasım ve Müezzin Ali Halîfe b. Mahmud ta‘rîfleriyle mu‘arrefe mezbûre Fâtıma Hâtun meclis-i ma‘kūd-ı mezbûrda bâ‘isü hâze’l-kitâbü’l-müstetâb Habib Çelebi b. İslâm mahzarında bi’t-tav‘i’s-sâf ikrâr ve i‘tirâf edip akd-i âtî sudûruna değin yedimde mülküm ve hakkım olan mahalle-i mezbûrda vâki‘ işbu bir tarafdan Sâlih Ağa b. Abdullah mülküne ve bir tarafdan Şalgam el-Hâc Mehmed mülküne ve bir tarafdan haffâflar sûkuna ve bir tarafdan tarîk-i hâssa müntehî tabaka-i ulyâsında bir bâb oda ve tabaka-i vustâsında iki bâb oda ve dehliz ve süflâsında bir matbah ve bir kiler ve bir su kuyusu ve cüneyneyi müştemil mülk menzilimi bi cümleti’t-tevâbi‘ ve’l-levâhık ve kâffeti’l-hukūk ve’l-merâfık [li e]beveyn karındaşım İslâm’ın sulbî oğlu mezbûr Habib Ağa’ya tarafeynden îcâb ve kabûlü hâvî bey‘-i kat‘î ile sekiz yüz guruşa [bey‘] ve teslîm edip ol dahi iştirâ ve tesellüm ve kabûl ettiğinden sonra semeni olan meblağ-ı mezbûr sekiz yüz guruşdan iki yüz on beş guruşunu mezbûr Habib Çelebi benim emrimle kendi mesârifime sarf ve düyûn-ı münsarıfa-i ma‘lûmemi edâ edip meblağ-ı bâkī beş yüz seksen guruşdan mezbûr Habib Çelebi’nin zimmetini ibrâ ve iskāt eyledim min ba‘d menzil-i mahdûd-ı mezkûr, mezkûr Habib Çelebi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mezbûr Fâtıma Hâtun yine meclis-i mezbûrda i‘âde-i kelâm ve ikrâr-ı tâm edip işbu meclis-i şer‘de müşâhede ve mu‘âyene olunan on aded beledî yastık ve üç minder ve üç sahan ve üç tencere ve bir güğüm ve bir el tavası ve bir leğen ve bir ibrik ve bir tepsi ve bir sînebend sandığı ve içinde iki müsta‘mel kaftan ve bir entari benim mülküm olup eşyâ-i mezkûreden mâ‘adâ işbu menzilde olan kalîl ü kesîr ve celîl ü hakīr eşyânın mecmû‘u mezbûr Habib Çelebi’nin mülkü ve hakkıdır eşyâ-i mezkûrede benim kat‘â hakkım ve müstahakkım yoktur dedikde mezbûr Habib Çelebi dahi mezbûr Fâtıma Hâtun’u bi’l-muvâcehe tasdîk ve bi’l-müşâfehe tahkīk ettiğini Mevlânâ-yı mezbûr mahallinde ketb ü tahrîr edip ba‘dehû ma‘an ba‘s olunan Mustafa Çelebi ve Ahmed b. Hasan ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Fahrü’l-eimme Mehmed Efendi b. Osman, Osman Beşe b. Hüseyin, Hüseyin Odabaşı b. Abdullah, Nasuh Odabaşı b. Yusuf, Mehmed Çelebi b. Ömer, Ömer Çelebi b. Osman.